Прэзентацыя кнігі Алеся Бяляцкага «Халоднае крыло Радзімы» ў Варшаве
Прэзентацыя кнігі старшыні Праваабарончага цэнтра «Вясна» Алеся Бяляцкага «Халоднае крыло Радзімы» адбудзецца 28 мая ў Беларускім доме ў Варшаве.
Галоўная тэма кнігі - успаміны аўтара пра сваё дзяцінства, горад юнацтва Светлагорск, вучоба ў Гомельскім універсітэце, пра канспіратыўную дзейнасць у 80-я гады, першых сяброў і аднадумцаў. У кнізе таксама змяшчаюцца дакументы таго часу, звязаныя з грамадскай дзейнасцю Алеся Бяляцкага.
“Халоднае крыло Радзімы” - своесаблівы працяг кнігі “Асвечаныя беларушчынай”. Некаторыя з эсэ раней публікаваліся ў перыядычным друку.
Укладаннем кнігі займалася праваабаронца і пісьменніца Паліна Качаткова. Як паведаміў сайту Радыё “Рацыя” арганізатар прэзентацыі, сустаршыня Беларускага Дома ў Варшаве Алесь Зарэмбюк, кніга вельмі карысная для сённяшняга чытача:
- Адбудзецца прэзентацыя кнігі “Халоднае крыло Радзімы”. Гэтая кніга была цалкам падрыхтаваная за кратамі – у беларускай лукашэнкаўскай турме. І яна апавядае пра дзейнасць грамадскіх ініцыятываў у далёкія 80-я гады за часамі Савецкага Саюза. І той досвед – ён даволі цікавы і шмат пра што можа распавесці.
Прэзентацыя кнігі ў Беларускім Доме ў Варшаве (ul. Wiejska 13/3) адбудзецца 28-га траўня. Пачатак а 18-й гадзіне.
