Максіма Вінярскага будуць судзіць за знявагу службовай асобы?
Леанід Кулакоў і Максім Вінярскі
Разгляд адміністратыўнай справы актывіста «Еўрапейскай Беларусі» Максіма Вінярскага папярэдне прызначаны на 20 траўня ў судзе Смалявічскага раёна.
Яго затрымалі 15 траўня супрацоўнікі міліцыі каля будынку Смалявіцкага РАУС, куды актывіст прыехаў сустрэць свайго паплечніка Леаніда Кулакова, які адбываў у Смалявічах сямісуткавы арышт.
Максім Вінярскі запытаўся ў супрацоўнікаў міліцыі, чаму Леаніда Кулакова таемна вывезлі на чыгуначны вакзал. Гэта і паслужыла падставай для затрымання. Актывіста праверылі на ўтрыманне алкаголю, а калі аналіз нічога не паказаў – склалі пратакол па арт. 23.5 КаАП (знявага службовай асобы, пры выкананні непасрэдных абавязкаў).
Пасля складання пратаколу, актывіста адпусцілі, паведаміўшы, што праінфармуюць пра дакладную дату суда.
