Алег Гулак: Унутраная бяспека ўладамі разумеецца як захаванне кантролю над усім, што тут адбываецца і гэта робіцца жорскім шляхам (відэа)

Старшыня РПГА “Беларускі Хельсінскі Камітэт” Алег Гулак лічыць, што ўзмацненне ціску на Мікалая Статкевіча можна патлумачыць тымі словамі, якія мы нядаўна пачулі ад кіраўніка дзяржавы, маўляў, Стакевіч сам вінаваты, што сядзіць да гэтага часу, паколькі ён мае магчымасць выйсці з калоніі праз прашэнне аб памілаванні. А ён гэтага рабіць ня хоча, - каментуе сітуацыю сайту  palitviazni.info праваабаронца.

За апошні тыдзень палітвязню Мікалаю Статкевічу, які адбывае пакаранне ў Шклоўскай папраўчай калоніі №17, вынеслі шэраг спагнанняў, склалі восем актаў. Як паведаміла жонка Міколы Статкевіча, яго пазбавілі кароткатэрміновага спаткання, якое планавалася ў красавіку, і харчовай перадачы. Акрамя таго, Статкевіча змясцілі ў штрафны ізалятар, а 3 красавіка – перавялі на два месяцы ў памяшканне камернага тыпу.