Баранавіцкі прадпрымальнік Мікалай Чарнавус замест сустрэчы з прэзідэнтам трапіў у міліцыю
Мікалай Чарнавус.
Лідэр баранавіцкіх прадпрымальнікаў Мікалай Чарнавус 17 сакавіка хацеў паехаць у Мінск на анансаваную сустрэчу прадпрымальнікаў з прэзідэнтам Аляксандрам Лукашэнкам. Але замест сустрэчы з кіраўніком дзяржавы грамадскі актывіст трапіў на індывідуальную размову ў гарадскую міліцыю. Супрацоўнік ГАУС капітан міліцыі Сяргей Паўленя правёў з ім прафілактычную размову аб неабходнасці выканання законаў.
– Позна вечарам 16 сакавіка мне патэлефанавалі з міліцыі на мабільны тэлефон і тэрмінова запрасілі на сустрэчу ў ГАУС а 10-й гадзіне раніцы, каб абмеркаваць, па словах супрацоўніка міліцыі, важныя дакументы, якія маюць дачыненне да маёй грамадскай дзейнасці. Я, безумоўна, мог і не пайсці, патрабуючы афіцыйнай позвы. Але мяне ўжо неаднаразова здымалі з цягніка, у кватэры рабілі вобыск,шмат разоў затрымлівалі ў горадзе, нават у больніцы пільнавалі, каб не ўцёк. Таму я не стаў абвастраць складаныя адносіны з праваахоўнымі органамі і прыйшоў на сустрэчу ў міліцыю. У выніку размовы мяне ўжо другі раз папярэдзілі за апошнія 2 тыдні, каб я не праводзіў мітынгі, шэсці, пікеты прадпрымальнікаў без дазволу гарадскіх уладаў, – паведаміў Мікалай Чарнавус.
Грамадскі актывіст перакананы, што тэрміновае запрашэнне ў міліцыю было найперш звязана з тым, каб перашкодзіць яму паехаць у Мінск на афіцыйную сустрэчу прадпрымальнікаў з прэзідэнтам.
