Бабруйск: Суддзю, якая прысудзіла тры гады "хіміі" сыну блогера Алега Жалнова, падвысілі

У судзейскім корпусе адбыліся змены, якія закранулі і бабруйскую суддзю Юлію Беразюк. У ліпені мінулага году яна разглядала справу Аляксея Жалнова, сына блогера Алега Жалнова, і асудзіла маладога чалавека на тры гады папраўчай калоніі адкрытага тыпу і вялікі штраф.

Юлія Беразюк прызначана суддзёй і старшынёй суда Кіраўскага раёна, тэрмінам на пяць гадоў. Да яе гэтую пасаду займаў Аляксей Клімаў. Гэты суддзя запомніўся вынясеннем пакаранняў за маўклівыя акцыі. У красавіку 2014 года стала вядома, што яго злавілі на хабары. Ад таго часу месца старшыні суда Кіраўскага раёна было вакантным, амаль год яго займала выконваючая абавязкі Таццяна Уліціна.