38 мільёнаў 250 тысяч – агульная сума штрафаў для ўдзельнікаў Дня памяці ў Свіслачы
Акцыя ў Свіслачы, фота volkovysk.by
Гродзенскія праваабаронцы падсумавалі штрафы-пакаранні, вынесеныя ўдзельнікам Дня памяці паўстанцаў 1863 года, што прайшоў 26 кастрычніка 2014 года ў раённым цэнтры Свіслач і колішнім родавым маёнтку Каліноўскіх – Якушоўцы. Усяго адміністрацыйныя пратаколы за ўдзел у нібыта несанкцыянаваным мерапрыемстве былі складзены на 17 чалавек. 14 з іх былі аштрафаваныя пастановамі судоў розных гарадоў краіны – Свіслачы, Гродна, Кобрына, Ваўкавыску, Ліды і Шклова агулам на 255 базавых велічыняў, што разам склала 38 мільёнаў 250 тысяч беларускіх рублёў. Адміністрацыйныя справы яшчэ трох чалавек былі закрытыя ў звязку са сканчэннем тэрміну даўніны.
Найбольшы даход дзяржаве сваімі пастановамі прынесла суддзя Ленінскага раённага суда Гродна Алена Пятрова – агулам яна аштрафавала пецярых прысутных на Дні памяці на 115 базавых велічынь – 17 мільёнаў 250 тысяч.
Суды абласной інстанцыі прадказальна не задаволілі аніводную з 9-ці пададзеных касацыйных скаргаў. Віталь Гуляк з Ваўкавыску, а таксама Ежы Грыгенча і Уладзімір Хільмановіч ужо адправілі скаргі ў Камітэт па правах чалавека ААН. Яшчэ шэраг незаконна асуджаных рыхтуюць свае аналагічныя скаргі ў КПЧ.
