Гомель: судовая калегія абласнога суду адмовіла маці расстралянага
Вольга Грунова
Судовая калегія па грамадзянскіх справах Гомельскага абласнога суду адмовілася праверыць прэтэнзіі маці пакаранага смерцю гамяльчаніна Вольгі Груновай да дзяржавы, пакінуўшы ў сіле рашэнне суда Цэнтральнага раёну аб адмове ва ўзбуджэнні грамадзянскай справы супраць Гомельскага абласнога суда і Дэпартамента выканання пакаранняў, якія адмаўляюцца паведаміць месца пахавання растралянага сына.
Старшыня Гомельскага абласнога суда Сяргей Шаўцоў пісьмова адмовіў Вользе Груновой у задавальненні просьбы паказаць месца пахавання яе сына. У пісьмовым адказе суд працытаваў заканадаўчую норму адносна нявыдачы целаў расстраляных, а менавіта, па арт. 175 Крымінальна-выканаўчага кодэкса, "смяротнае пакаранне, выконваецца непублічна шляхам расстрэлу. Цела для пахавання не выдаецца, аб месцы пахавання не паведамляецца".
З дапамогай праваабаронцаў Вольга Грунова распачала стратэгічную цяжбу, накіраваную на змяненне як заканадаўства, так і практыкі яго прымянення, якія кожны раз вядуць да пакут бацькоў ды сваякоў растраляных у Беларусі.
Праваабаронца Леанід Судаленка, які дапамагае жанчыне весці справу ў судах, упэўнены, поўная сакрэтнасць вакол даты экзэкуцыі і месца пахавання, а таксама адмова ў выдачы цела для пахавання ў адпаведнасці з рэлігійнымі перакананнямі і звычаямі сям'і пакаранага ўяўляюць эфект запалохвання і пакарання шляхам наўмыснага пакідання іх у стане невядомасці і псіхалагічнага стрэсу. Гэта, а таксама ўпартая адмова дзяржавы ў інфармаванні маці аб месцы пахавання сына, ўяўляюць сабой бесчалавечнае абыходжанне.
"Зараз нам трэба прайсці ўсе ўнутраныя даступныя сродкі прававой абароны, а менавіта, абласны нагляд у старшыні і нагляд у старшыні Вярхоўнага Суду, а потым скарга ў Камітэт па правах чалавека. Няхай з трыбуны ААН Урад Беларусі адкажа, чаму ў краіне да сёняшняга дня прымяняецца па сваёй сутнасці “сталінскае” заканадаўства", - кажа Леанід Судаленка.
Нагадаем, Аляксандр Груноў быў расстраляны 22 кастрычніка 2014 года за забойства знаёмай дзяўчыны. Ён паспеў зарэгістраваць скаргу ў Камітэце ААН па правах чалавека, які публічна выказаўся ў дачыненні да пакарання смерцю. Незалежна ад выканання смяротнага прысуду Камітэт па правах чалавека працягвае разглядаць справу Грунова.
