Таямнічым рашэннем Салігорскага райвыканкаму зоймецца пракуратура
Прадстаўнік Беларускага Хельсінскага камітэту Леанід Мархотка накіраваў скаргу ў пракуратуру на адмову Салігорскага райвыканкаму ў правядзенні пікету да Дня правоў чалавека і на неадэкватныя дзеянні галоўнага ідэолага, які з публічнага рашэння Салігорскага выканкаму зрабіў дзяржаўную таямніцу.
Нагадаем, забарону пікету Салігорскі райвыканкам абгрунтаваў сваім жа рашэннем ад 07.10.2004г. №700 “Аб мерах па папярэджанні надзвычайных здарэнняў і захаванні законнасці пры правядзенні масавых мерапрыемстваў”. На афіцыйным сайце выканкаму дадзенае рашэнне адсутнічае, а прадставіць копію гэтага дакумента на рукі галоўны ідэолаг раёну Мікалай Маскевіч катэгарычна адмовіўся.
Дзеянні прадстаўнікоў улады праваабаронца БХК называе незаконнымі, адказ чыноўнікаў нематываваным. Уведамленне аб адмове ў праведзенні пікету Леанід Махотка лічыць неадпавядаючым дзеючаму заканадаўству аб масавых мерапрыемствах, а таксама закону аб зваротах грамадзян.
Праваабаронца патрабуе ад Салігорскай пракуратуры рэагавання на гэтыя факты. Таксама Леанід Мархотка чакае пракурорскага рэагавання на адсутнасць на сайце выканкаму рашэння №700 і на адмову чыноўнікаў Салігорскага райвыканкаму ў прадстаўленні копіі гэтага дакумента. Прадстаўнік БХК лічыць, што гэтае рашэнне не можа трапляць пад заканадаўства аб дзяржаўнай таямніцы і таму адмова ад яго публікацыі і выдачы копіі па запыту грамадзян з’яўляюцца незаконнымі.
