Аляксандру Грунову адмоўлена ў памілаванні
Аляксандр Груноў. Фота: gp.by
Сёння, 3 лістапада, Праваабарончаму цэнтру “Вясна” стала вядома, што асуджанаму да смяротнага пакарання жыхару Гомеля Аляксандру Грунову адмоўлена ў памілаванні.
Паводле інфармацыі, якой валодаюць праваабаронцы, справа Аляксандра Грунова 13 кастрычніка паступіла ў Гомельскі абласны суд з пазнакай, што асуджанаму адмоўлена ў памілаванні і ўсе працэсуальныя дзеянні па абскарджанні смяротнага прысуду выкарыстаныя.
Бліжэйшымі днямі адвакат Аляксандра Грунова збіраецца наведаць свайго падабароннага, які ўтрымліваецца ў камеры смяротнікаў мінскай Валадаркі.
Як адзначае Андрэй Палуда, каардынатар кампаніі “Праваабаронцы супраць смяротнага пакарання ў Беларусі”, гэтая навіна не можа не выклікаць заклапочанасці, паколькі папярэдняя практыка паказвае, што пасля адмовы ў памілаванні смяротны прысуд прыводзіцца ў выкананне ў вельмі кароткі тэрмін. Да таго ж, як правіла, прыблізна ў адзін і той жа час расстрэльваюцца некалькі асуджаных да смяротнай кары. На сённяшні дзень праваабаронцам вядома пра яшчэ аднаго асуджанага, які чакае выканання прысуду - Эдуарда Лыкава.
