Салігорск: Маладафронтаўца Івана Шылу выклікаюць у міліцыю
Іван Шыла
Маладафронтаўца Івана Шылу рашуквае міліцыя. Увечары 1-га кастрычніка дом яго бацькоў пад Салігорскам наведалі супрацоўнікі мясцовага РАУС.
Па словах бацькі маладзёна Уладзіміра Шылы, міліцыянты з’явіліся на ганку яго дома а 20-й гадзіне:
- Аднекуль даведаліся, што Іван мусіў прыехаць у гэтыя дні з вучобы ў Салігорск і хацелі затрымаць яго. Але сына дома не было, дык пакінулі яму позву на 2 кастрычніка на 9 раніцы. Позва аформлена няправільна. Замест нумара справы пазначана “на размову ў 203 кабінет”, - кажа бацька актывіста.
Як вядома, у гэтым кабінеце Салігорскага РАУС месціцца аддзел аховы правапарадку і прафілактыкі Салігорскага РАУС. Узначальвае аддзел сумнавядомы браканьер і паляўнічы за апазіцыяй Георгій Крывальцэвіч. Менавіта ён некалькі дзён таму зладзіў аблаву на мясцовага актывіста “Еўрапейскай Беларусі” Уладзіміра Лемеша, пагражаў яму групавым згвалтаваннем ды кіраваў вобыскам у яго кватэры, падчас якога намагаўся канфіскаваць нават дзверы з апазіцыйнымі налепкамі.
У такіх абставінах сам Іван Шыла глядзіць на сітуацыю без аптымізму і рыхтуецца да арышту:
- Апошнім часам у Салігорску назіраецца бурлівая апазіцыйная дзейнасць. З’яўляюцца ўлёткі, сцягі, графіці, нейкія арт-групы ладзяць пратэсты. Думаю, мясцовым уладам надавалі за гэта па шапцы, і цяпер яны спрабуюць праз пераслед мясцовых актывістаў апраўдацца перад вышэйшым кіраўніцтвам. Я хоць практычна ўвесь час і знаходжуся на вучобе ў Польшы, але, відаць, акрамя мяне, Тычыны і Лемеша ніякіх моладзевых актывістаў яны больш не ведаюць, - кажа маладафронтавец. - Таму не выключаю, што ўжо ў бліжэйшыя дні магу апынуцца ў ізалятары. Бо трэба ж неяк міліцыянтам адсправаздачыцца перад мінскім начальствам аб зробленых кроках па супрацьдзеянні гэтай апазіцыйнай хвалі ў горадзе.
Нагадаем, у апошнія тыдні ў сталіцы шахцёраў распачаўся сапраўдны “сезон палявання” на апазіцыянераў. Вобыскі і канфіскацыя кампутарнай тэхнікі ды апазіцыйнай прадукцыі адбыліся ў кватэрах Андрэя Тычыны, Уладзіміра Лемеша і Уладзіміра Шылы. Уладзіміру Лемешу нават прыйшлося адседзець некалькі сутак у ізалятары і атрымаць штраф па ўжо звыклым для апазіцыянераў абвінавачванні ў лаянцы матам і размахванні рукамі. У выпадку з Андрэям Тычынай міліцыянты вырашылі скрэатывіць і правярыць яго на датычнасць да распаўсюду парнаграфіі і экстрэмізму.
