Камісія па выяўленні экстрэмізму ў друкаванай прадукцыі пачне працаваць з 27 верасня
Рэспубліканская экспертная камісія па ацэнцы інфармацыйнай прадукцыі на прадмет наяўнасці ў ёй прыкметаў экстрэмізму пачне працаваць у Беларусі 27 верасня, паведамляе «Ежедневник».
Як паведаміў на прэс-канферэнцыі намеснік міністра інфармацыі Беларусі Уладзімір Матусевіч, гаворка не ідзе пра пазасудовыя рашэнні, на падставе якіх друкаваная прадукцыя будзе забірацца з абарачэння.
Паводле намесніка міністра, камісія створана ў развіццё закона "Аб супрацьдзеянні экстрэмізму" і будзе толькі выносіць экспертнае заключэнне на прадмет наяўнасці або адсутнасці прыкметаў экстрэмізму. А вось экстрэмісцкімі матэрыялы будуць па-ранейшаму прызнавацца рашэннем суда. Праўда, у аснову рашэння ўсё ж будзе брацца менавіта пазіцыя ствараемай камісіі. Вядома, тэарэтычна заключэнне экспертнай камісіі можна будзе абскардзіць у судовым парадку, але як гэта зрабіць на практыцы, калі іншых экспертаў па экстрэмізму ў Беларусі не будзе, Уладзімір Матусевіч не патлумачыў.
Па сутнасці атрымліваецца, што якраз камісія і будзе асноўным органам, які з 27 верасня пачне вызначаць, якія друкаваныя матэрыялы належаць да экстрэмісцкіх.
