Арыштаваны на 5 сутак Кастусь Жукоўскі абвясціў галадоўку, а ў ізалятары не прынялі для яго нават ваду

У ізалятары часовага ўтрымання гомельскага УУС грамадскі актывіст Кастусь Жукоўскі абвясціў галадоўку. Нагадаем, у судзе Цэнтральнага раёна Гомеля 28 жніўня была разгледжана адміністрацыйная справа Жукоўскага, які быў затрыманы супрацоўнікамі АМАП 25 жніўня. Па рашэнню суддзі Вольгі Казловай актывіст прызнаны вінаватым у непадпарадкаванні супрацоўнікам міліцыі (арт. 23.4 КаАП) і пакараны адміністрацыйным арыштам тэрмінам на 5 сутак. На судзе Жукоўскі падкрэсліў, што ён не вінаваты ў правапарушэнні.

Жонка актывіста Алена Жукоўская спрабавала перадаць мужу цёплыя рэчы, бутэльку з вадой і вітаміны, аднак у ІЧУ нічога не прынялі і патлумачылі гэта тым, што «Жукоўскі мае дробнае парушэнне».