Дунья Міятавіч заклікала ўлады Крыма спыніць запалохванне журналістаў
Дуня Міятавіч
Прадстаўнік АБСЕ па пытаннях свабоды СМІ Дунья Міятавіч 18 жніўня выказала занепакоенасць з нагоды пагаршэння сітуацыі ў сферы СМІ ў Крыме.
Яе выказванне выклікана тым, што фактычныя ўлады Крыма прынялі рашэнне аб забароне на ўезд на паўвостраў у дачыненні да журналіста Ісмета Юкселя.
9 жніўня Ісмету Юкселю, генеральнаму каардынатару інфармацыйнага агенцтва QHA і супрацоўніку турэцкага тэлеканала TRT, быў забаронены ўезд у Крым на працягу пяці гадоў. Улады не патлумачылі прычыны забароны.
"Я заклікаю ўлады Крыма спыніць запалохванне прадстаўнікоў сродкаў масавай інфармацыі і ўстрымлівацца ад задушэння крытычных галасоў", — заявіла Міятавіч. "Такія адвольныя і абмежавальныя захады нельга трываць, паколькі яны ўплываюць на свабодны распаўсюд інфармацыі і свабоду СМІ".
Раней у гэтым месяцы Міятавіч асудзіла захоп маёмасці кампаніі “Чарнаморская” - найбуйнейшай незалежнай вяшчальнай кампаніі на Крымскім паўвостраве.
