У Маладэчне нарастае заклапочанасць дзейнасцю незарэгістраваных прарасійскіх арганізацыяў
Праваабаронца з Маладэчна Алесь Капуцкі
У Маладэчне 4 жніўня прайшоў круглы стол з нагоды Дня салідарнасці з грамадзянскай супольнасцю Беларусі, у якім узялі ўдзел мясцовыя праваабаронцы, прадстаўнікі палітычных партыяў, грамадскіх аб’яднанняў і ініцыятываў дэмакратычнай скіраванасці.
Пра мерапрыемства распавёў адзін з удзельнікаў, праваабаронца Алесь Капуцкі.
Падчас круглага стала яго ўдзельнікі абмеркавалі сітуацыю з правамі чалавека як у краіне ў цэлым, так і на мясцовым узроўні. Гучалі прапановы наконт таго, як больш эфектыўна пашыраць інфармацыю пра палітвязняў праз мясцовы друк і інтэрнэт, у прыватнасці, праз сацыяльныя сеткі. Таксама ўвага была нададзена апошняму інцыдэнту са збіццём экстрэмісцкімі сіламі актывіста руху “Еўрапейская Беларусь” у электрычцы “Мінск-Маладэчна” і абмяркоўваліся магчымыя шляхі супрацьдзеяння пашырэнню такіх з’яваў у грамадстве. У выніку ўдзельнікі круглага стала вырашылі звярнуцца ў праваахоўныя органы з патрабаваннем спынення ў горадзе дзейнасці незарэгістраваных прарасійскіх арганізацыяў экстрэмісцкага толку.
