Прафілактычны ўлік не стане перашкодай для Алеся Бяляцкага ў ажыццяўленні міжнароднай дзейнасці
Кіраўнік ПЦ "Вясна" Алесь Бяляцкі падчас прэс-канферэнцыі 23 чэрвеня ў Мінску
23 чэрвеня кіраўнік ПЦ “Вясна” Алесь Бяляцкі наведаўся ў Крымінальна-выканаўчую інспекцыю Першамайскага РУУС Мінска, дзе быў пастаўлены на прафілактычны ўлік.
У дачыненні да нядаўняга палітвязня ўстаноўленыя “прафілактычныя” абмежаванні і абавязкі.
- Я падпісаў паперу пра прафілактычны ўлік, згодна з якой раз на месяц мяне мусіць правяраць участковы, я мушу не здзяйсняць больш трох адміністратыўных правапарушэнняў за год, таму што тады ў іх будуць падставы для прэвентыўнага нагляду – больш суровай формы нагляду над тымі, хто адбыў пакаранне. Форма ж прафілактычнага ўліку мне зараз дазваляе выязджаць у любы пункт Беларусі і за межы краіны на тэрмін меншы за месяц. Гэта значыць, што я не павінен паведамляць у інспекцыю, калі я выязджаю на некалькі дзён, - распавёў Алесь Бяляцкі.
Адзінае, на што звяртае ўвагу праваабаронца, у падпісанай ім паперы не прапісана, колькі часу будзе дзейнічаць у дачыненні да яго прафілактычны ўлік. Ён мяркуе, што гэта яму мусіць патлумачыць участковы з РУУС Партызанскага раёна, якому будзе перададзеная яго справа па месцы жыхарства.
