Спэцдакладчык ААН: беларускія ўлады адмаўляюцца ад супрацоўніцтва
Міклаш Харасці, спецыяльны дакладчык ААН па сітуацыі з правамі чалавека ў Беларусі
«Парушэньні правоў чалавека ў Беларусі носяць сыстэматычны характар», — заявіў 18 чэрвеня спэцдакладчык ААН па правах чалавека ў Беларусі Міклаш Харасьці на пасяджэньні Рады па правах чалавека ААН.
«Я ўжо казаў, што адміністрацыйныя арышты і затрыманьні на кароткі тэрмін робяцца сыстэматычна ў масавым парадку ў адказ на дзеяньні грамадзян, якія спрабуюць рэалізаваць свае правы на свабоду сходаў і волевыяўленьня», — адзначыў ён.
Паводле Харасьці, беларускіх студэнтаў, як мяркуецца, прымушалі будаваць спарткомплекс «Чыжоўка-Арэна» ў Менску, які прымаў матчы чэмпіянату сьвету па хакеі 2014 году.
Беларускія ўлады, заявіў спэцдакладчык, «у недастатковай меры ўзаемадзейнічаюць з мэханізмамі Рады, што яшчэ больш пагаршае сытуацыю».
Спэцдакладчык ААН па правах чалавека таксама з жалем адзначыў, што ўлады Беларусі дагэтуль не дазволілі яму наведаць краіну.
«Тым ня менш я працягваю дамагацца супрацоўніцтва з уладамі гэтай краіны, каб весьці зь імі канструктыўны дыялёг», — цытуе Інтэрфакс Харасьці.
