Анатоль Паплаўны ініцыяваў пракурорскую праверку
Праваабаронца Анатоль Паплаўны ля Гомельскага аблсуду
Гомельскі праваабаронца Анатоль Паплаўны просіць пракурора Гомеля Сяргея Зайцава правесці праверку таварыства з абмежаванай адказнасцю «ОМА», дзе на яго скаргу на беларускай мове ў кнізе заўваг і прапаноў адказалі на рускай мове. Дырэктарка крамы Наталля Ўрублеўская лічыць што “дзелавая перапіска і заканадаўчыя дакументы павінны даводзіцца да насельніцтва на рускай мове”.
Праваабаронца са спасылкай на нормы закону лічыць, што адказ яму мусілі даць на мове звароту, а менавіта на беларускай мове.
“У дзеяннях кіраўніцтва ТАА «ОМА» ў частцы адказу на скаргу не на мове звароту ўгледжваю парушэнне Закона Рэспублікі Беларусь "Аб зваротах грамадзян і юрыдычных асобаў", паводле артыкула 18 якога пісьмовыя адказы на пісьмовыя звароты выкладаюцца на мове звароту”, - напісаў пракурору праваабаронца.
“Артыкул 26 названага Закона ўсталёўвае, што за парушэнне парадку разгляду зваротаў арганізацыі, іх службовыя асобы, індывідуальныя прадпрымальнікі і іх работнікі нясуць адказнасць у адпаведнасці з заканадаўчымі актамі. Артыкулам 9.13 КаАП за парушэнне заканадаўства аб зваротах грамадзян ўстаноўлена адміністрацыйная адказнасць”, - дапоўніў заяву пракурору Гомеля А. Паплаўны.
Па выкладзеных фактах праваабаронца просіць правесці праверку па выніку якой прыцягнуць вінаватых службовых асоб ТАА "ОМА" да адміністрацыйнай адказнасці і аб прынятых мерах паведаміць у яго адрас пісьмова.
Напамятаем, за парушэнне парадку разгляду зваротаў грамадзян усталявана адміністрацыйная адказнасць у выглядзе адміністрацыйнага штафу ў памеры ад 4-х да 10 базавых адзінак (ад 600 тыс. руб – да 1,5 млн. руб).
