Аўтары індывідуальнага паведамлення, пададзенага у КПЧ ААН ад імя Алеся Бяляцкага, звярнуліся з адкрытым лістом

Аўтары індывідуальнага паведамлення, пададзенага ў Камітэт па правах чалавека ААН ад імя Алеся Бяляцкага, старшыні ПЦ "Вясна", віцэ-прэзідэнта Міжнароднай Федэрацыі за правы чалавека (FIDH), звярнуліся ў Камітэт па правах чалавека з адкрытым лістом. Антуан Бернар, Генеральны дырэктар Міжнароднай Федэрацыі за правы чалавека (FIDH), і Наталля Пінчук, жонка палітвязня Алеся Бяляцкага, просяць аб больш хуткім разглядзе Камітэтам пададзенай два гады таму скаргі.

Валянцін Стэфановіч, намеснік старшыні ПЦ "Вясна" каментуе: "Паведамленне ад імя Алеся Бяляцкага на неправамоцнае пазбаўленне волі з прычыны парушэння яго правоў было пададзена ў Камітэт па правах чалавека 12 красавіка 2012 года. У ім заяўлялася, што адмовы дзяржаўнай рэгістрацыі грамадскага аб'яднання" Вясна " у 2007 і 2009 гг., папярэджанне пракуратуры аб недапушчальнасці дзеяння ад імя незарэгістраванай арганізацыі, і нарэшце, крымінальны пераслед і асуджэнне Бяляцкага ў 2011 з'яўляюцца парушэннем яго правоў на асацыяцыю, на свабоду і асабістую недатыкальнасць і на справядлівае судовае разбіральніцтва (на падставе артыкулаў 9, 14,22 Міжнароднага пакта аб грамадзянскіх і палітычных правах).

Па працэдуры разгляду справы ў Камітэце, дзяржава павінна была прадставіць у адказ свае аргументы па дадзеным паведамленні. Але ўжо ў ліпені 2012 года пастаянная місія Рэспублікі Беларусь пры офісе ААН у Жэневе накіравала ў КПЧ ноту, у якой адназначна заявіла аб адмове дзяржавы супрацоўнічаць з Камітэтам па гэтай справе і аб спыненні далейшых камунікацый у гэтай сувязі. З тых часоў дзяржава кіруеццагэтай пазіцыі, не падаючы ніякіх паведамленняў па справе, хоць КПЧ накіраваў Беларусі ўжо два напамінанні з прапановай даць каментары па сутнасці.

Такой жа пазіцыі беларуская дзяржава прытрымліваецца на працягу апошніх некалькіх гадоў і па іншых справах, якія знаходзяцца на разглядзе ў Камітэце па правах чалавека, парушаючы тым самым свае абавязацельствы па Факультатыўным пратаколе да Пакту. У сувязі з гэтым, уяўляецца, што няма ніякіх падстаў чакаць адказу дзяржавы па справе Бяляцкага і адкладаць па гэтай прычыне яго разгляд у КПЧ ўжо больш за два гады. Той факт, што дзяржава адмовілася ад камунікацый з Камітэтам, не з'яўляецца перашкодай да разгляду скаргі, і прадстаўнікі Бяляцкага звяртаюцца да Камітэта з просьбай паскорыць гэты працэс.

Алесь Бяляцкі знаходзіцца ў цяжкіх умовах папраўчай калоніі ўжо амаль тры гады. Магчымасці яго прававой абароны ўнутры дзяржавы вычарпаныя, і нават вельмі сур'ёзная міжнародная кампанія за яго вызваленне не прывяла да змены яго становішча. Рашэнне Камітэта па правах чалавека як органа, кампетэнцыю якога Беларусь прызнала па міжнароднай дамове, павінна даць ацэнку ягонай справе з пункту гледжання міжнароднага права. Калі Камітэт прызнае парушэнне правоў Бяляцкага дзяржавай, то на апошняе будзе ўскладзена юрыдычны абавязак ліквідаваць гэта парушэнне, на падставе артыкула 2 Міжнароднага пакта аб грамадзянскіх і палітычных правах."