Андрэя Кашэўскага ізноў вязуць у “Навінкі”
Андрэй Кашэўскі. Фота “Нашай нівы”
Падставай для чарговага змяшчэння актывіста ў Рэспубліканскі цэнтр псіхічнага здароўя, паслужыла нібыта скарга суседзяў.
2 траўня ў 15 гадзін да дома Кашэўскага ў Смалявічах пад’ехаў міліцэйскі аўтамабіль. Медыцынскі работнік у суправаджэнні супрацоўнікаў міліцыі паведамілі Кашэўскаму, што яго павязуць у “Навінкі”. Як паспеў паведаміць па тэлефоне Кашэўскі, аніякіх дакументаў на прымусовае лячэнне яму не прадставілі. Сваёй згоды на шпіталізацыю ў псіхічную лякарню Андрэй таксама не даваў.
Зусім нядаўна Андрэй Кашэўскі правёў у “Навінках” цэлы месяц. Падставаю для змяшчэння ў псіхіятрычны шпіталь паслужыла… жоўта-блакітная стужка, якую Кашэўскі прывёз з ўкраінскага Майдану. На гэты раз, праз прымусовае лячэнне, Андрэя спрабуюць ізаляваць перад Чэмпіянатам свету па хакеі.
Патрэбна дадаць, што некалькі гадоў назад Кашэўскі быў узяты на ўлік у псіхіятра, паколькі неаднаразова вывешваў на доме ў Смалявічах бел-чырвона белы сцяг.
