ПЦ «Вясна» прэзентуе штогадовы агляд-хроніку парушэнняў правоў чалавека
Выданне Праваабарончага цэнтра "Вясна"
Кніга “Сітуацыя з правамі чалавека ў Беларусі ў 2013 годзе” ўключае аналіз важнейшых падзеяў, якія ўплывалі на стан правоў чалавека ў краіне цягам мінулага года, а таксама найбольш яўныя і характэрныя факты парушэнняў.
“Сітуацыя з выкананнем правоў чалавека ў краіне на працягу 2013 года заставалася стабільна цяжкай: асноўныя палітычныя і грамадзянскія правы насілі скрайне лімітаваны характар, адбывалася далейшая кансервацыя жорсткіх і аўтарытарных практык, замацоўваліся сістэматычныя і сістэмныя праблемы”, адзначаецца ва ўступе да выдання, дзе падаецца апісанне такіх праблемаў, як палітычна матываваны пераслед грамадзянаў, смяротнае пакаранне, выкарыстанне катаванняў, свабода слова, становішча праваабаронцаў і змены ў Выбарчым кодэксе напярэдадні мясцовых выбараў. Сітуацыя з правамі чалавека ў Беларусі аналізуецца і ў міжнародным кантэксце.
Агляд падрыхтаваны на падставе зваротаў у Праваабарончы цэнтр “Вясна” ахвяраў парушэнняў правоў чалавека, фактаў, зафіксаваных праваабаронцамі, а таксама агучаных у адкрытых крыніцах інфармацыі.
Кніга “Сітуацыя з правамі чалавека ў Беларусі ў 2013 годзе” на беларускай і англійскай мовах для вольнага распаўсюду ёсць у офісе ПЦ “Вясна”, а таксама ў электронным выглядзе ў фармаце PDF.
