У смаргонскага актывіста Уладзіміра Шульжыцкага правялі ператрус

Паводле Шульжыцкага, яго затрымалі за раздачу праваабарончага бюлетэня «Смаргонскі грак» у адным з гарадскіх інтэрнатаў. Міліцыянты склалі пратакол і канфіскавалі 31 асобнік бюлетэня на падставе таго, што Шульжыцкі, з ягоных слоў, не меў пры сабе дазволу на распаўсюд бюлетэня.

Пасля гэтага зрабілі ператрус у ягонай кватэры, дзе знайшлі яшчэ адзін нумар бюлетэня. Шульжыцкага адпусцілі, але выпісалі позву ў РАУС на 25 сакавіка.

Бюлетэнь «Смаргонскі грак» выдаецца нерэгулярна на працягу трох гадоў накладам 299 асобнікаў. Рэдактар — смаргонскі праваабаронца Алесь Дзергачоў. Яго вельмі здзівіла затрыманне Шульжыцкага і праведзены ў ягонай кватэры ператрус:

«Я здзіўлены, што міліцыянты казалі пра нейкую пастанову наконт дазволу на распаўсюд бюлетэня. Нічога падобнага ў заканадаўстве няма. Дый у самім бюлетэні ніякіх забароненых тэмаў не асвятлялася. Галоўная тэма нумару — чаму смаргонскія сябры БНФ не бяруць удзелу ў выбарах».