У Ельску будуць судзіць Міколу Дземідзенку і Змітра Крэмянецкага
У судзе Ельскага раёна (Гомельшчына) у панядзелак 24 лютага адбудзецца разгляд адміністрацыйных спраў актывістаў “Маладога фронту” Міколы Дземідзенкі і Змітра Крэмянецкага. Іх вінавацяць у парушэнні артыкула 17.1 КаАП (дробнае хуліганства).
Актывістаў, якія выпраўляліся ў Кіеў, раніцай 22 лютага спынілі ўкраінскія памежнікі і без тлумачэння прычын паставілі штампы на забарону ўезду на тэрыторыю Ўкраіны на 5 год. Затым Дземідзенку і Крэмянецкага перадалі беларускаму боку. Там іх доўга трымалі ў чаканні міліцыі, а затым адвезлі ў бліжэйшы РАУС, у Ельск, дзе былі складзеныя пратаколы адміністрацыйнага правапарушэння. Да суду актывісты знаходзяцца ў мясцовым пастарунку.
Прэсавая служба “Маладога фронту” нагадвае, што падчас папярэдняга візіту на Майдан у снежні у малодафронтаўцаў узялі падпіску аб неўдзеле ў пратэстных акцыях на тэрыторыі Ўкраіны.
