Прэвентыўны арышт напярэдадні акцыі "Стоп падатак"
Актывіст Дзмітрый Паліенка
26 снежня ў Мінску быў затрыманы актывіст Нацыянал-Бальшавіцкай Партыі Дзмітрый Паліенка. Затрыманне адбылося каля 16.00 прама на прахадной завода МАЗ, дзе ён працуе. Актывіста даставілі ў РУУС Заводскага раёна і склалі пратакол па артыкуле 17.1 КаАП за “дробнае хуліганства”.
Судзілі актывіста 27 снежня. Суддзя Заводскага раёна Анастасія Осіпчык пакарала Паліенку 15 суткамі адміністратыўнага арышту, пры гэтым адмовіла ў хадайніцтве аб запатрабаванні і праглядзе відэа з прахадной заводу, якое магло засведчыць, што ён не рабіў ніякіх супрацьпраўных дзеянняў.
Дзмітрый Паліенка збіраецца абскарджваць затрыманне і рашэнне суддзі пра яго арышт. Актывіст расцэньвае гэтыя незаконныя дзеянні праваахоўнікаў як прэвентыўны пераслед, звязаны з прызначанай на сёння акцыяй “Стоп падатак”, адміністратарам суполкі якой ён з'яўляецца ў сацыяльнай сетцы “УКантакце”.
Праваабарончы цэнтр “Вясна” нагадвае, што гэта не першае прэвентыўнае затрыманне моладзевага актывіста. Такім жа чынам ён быў ізаляваны напярэдадні паседжання Савета кіраўнікоў МЗС краінаў СНД, якое праходзіла ў Мінску 24 кастрычніка.
