Маці памерлага ў светлагорскім ІЧУ затрыманага звернецца ў суд
Апошняй кропляй стала адпіска раённага пракурора Уладзіміра Тарасенкі, якая паказала бессэнсоўнасць далейшай перапіскі з органамі пракуратуры. Ён разгледзеў скаргу Валянціны Акуліч, нават не азнаёміўшыся з матэрыяламі праверкі па факце смерці яе сына.
Паўтары гады жанчына дамагаецца крымінальнага пакарання для супрацоўнікаў Светлагорскага РАУС Бачко А.А. і Сцешанкова Р.В., па віне якіх, як яна настойвае, у ІЧУ ў траўні мінулага года памёр яе сын Аляксандр Акуліч.
Следчы камітэт неаднаразова адмаўляў Валянціне Акуліч ва ўзбуджэнні крымінальнай справы па факце смерці яе сына, і яна неаднаразова абскарджвала гэтыя адмовы.
У адказе на апошнюю скаргу аб нязгодзе з вынесенай Светлагорскім РАСК пастановай пракурор Светлагорскага раёна Уладзімір Тарасенка "традыцыйна" адказаў, што "рашэнне аб адмове ва ўзбуджэнні крымінальнай справы прынята законна, праверка праведзена ў поўным аб'ёме, падставаў для адмены прынятага рашэння няма".
Але пра які "поўны аб'ём" пракурорскай праверкі можа ісці гаворка, калі ў наступным абзацы паведамляецца: "25.11.2013 матэрыял праверкі па факце смерці Акуліча А.А. для вывучэння і праверкі законнасці прынятага рашэння накіраваны ў пракуратуру Гомельскай вобласці, дзе ў цяперашні час і знаходзіцца". Гэты адказ Уладзіміра Тарасенка датаваны 13.12.2013 , а скарга Валянціны Акуліч паступіла ў пракуратуру 12.12.2013. Атрымліваецца, што пракурор адпісаўся на скаргу без азнаямлення з матэрыяламі праверкі.
У выпадку нязгоды Уладзімір Тарасенка прапануе абскарджваць яго рашэнне ў пракуратуру Гомельскай вобласці. Але праваабаронцы з ПЦ "Вясна", якія дапамагаюць Валянціне Акуліч ў працэсе абскарджання, лічаць, што па заканчэнні вывучэння справы ў абласной пракуратуры яна павінна быць накіравана ў суд.
Чытайце па тэме:
Следчы абышоў патрабаванні пракурора ў справе аб смерці затрыманага ў Светлагорскім ІЧУ
Змаганне з беспакаранасцю светлагорскіх міліцыянтаў працягваецца
Маці памерлага ў Светлагорскім ІЧУ Аляксандра Акуліча настойвае на допыце судмедэкспертаў
Светлагорскі СК не жадае прызнаваць віну супрацоўнікаў міліцыі ў смерці Аляксандра Акуліча
Жыхарка Светлагорска патрабуе пакараць вінаватых у смерці сына супрацоўнікаў міліцыі
