Справу слуцкай актывісткі Зінаіды Цімошак суд разгледзіць 19 снежня
Грамадская актывістка Зінаіда Цімошак (фота газеты “Інфа-Кур’ер”)
Суд над арганізатаркай прагляду фільма пра Слуцкі збройны чын, актывісткай Зінаідай Цімошак працягнецца 19 снежня. Пачатак - у 14-30 у судзе Слуцкага раёна. Яе вінавацяць па артыкуле 23.34 КаАП (арганізацыя альбо ўдзел у несанкцыянаваным масавым мерапрыемстве).
Вечарам 23 лістапада міліцыянты ўварваліся ў Дом культуры вёскі Казловічы Слуцкага раёна, дзе планаваўся паказ фільма пра Слуцкі збройны чын. Кіраўнік міліцыянтаў – прадстаўнік аддзела аховы правапарадку Слуцкага РАУС Дзьмітры Шклярэўскі патлумачыў, што ў арганізатаркі імпрэзы Зінаіды Цімошак «няма санкцыі на сустрэчу». Тады і быў складзены пратакол аб адміністрацыйным правапарушэнні.
У сваю чаргу Цімошак абскарджвае дзеянні супрацоўнікаў міліцыі, прычым скаргу падала не толькі спадарыня Цімошак, але і шэсць пенсіянераў, якія прыехалі на кінапрагляд. Яны будуць абскарджваць дзеянні міліцыянтаў як антыканстытуцыйныя. Юрыдычную дапамогу аказвае праваабарончы цэнтр "Вясна".
