Актывіст незалежнага прафсаюза атрымае кампенсацыю ад прадпрыемства “Граніт”
Леанід Дубаносаў
Суд Лунінецкага раёна часткова задаволіў патрабаванні Леаніда Дубаносава, якога звольнілі з прадпрыемства ў Мікашэвічах.
Сёлета з актывістам Беларускага незалежнага прафсаюза, які амаль 25 гадоў адпрацаваў на “Граніце”, не быў працягнуты кантракт. Сам Дубаносаў упэўнены, што падставай для звальнення з’явіўся менавіта яго ўдзел у незалежным прафсаюзным руху, бо ніякіх спагнанняў, якія б тычыліся непасрэдна працоўных адносін, ён ад адміністрацыі прадпрыемства не атрымоўваў.
Між тым, Леанід Дубаносаў вырашыў у судовым парадку патрабаваць кампенсацыі, бо ўпэўнены, што пры звальненні з працы адміністрацыя “Граніта” груба парушыла ўсталяваны парадак. Згодна з дзеючым заканадаўствам, наймальнік абавязаны не пазней, чым за 1 месяц да заканчэння тэрміну дзеяння кантракту пісьмова папярэдзіць аб сваіх намерах у частцы спынення працоўных адносін. Але пісьмовага папярэджання аб маючым адбыцца скасаванні кантракта Дубаносаву не ўручылі, і гэтая акалічнасць з’явілася нагодай для судовага разбіральніцтва.
У якасці кампенсацыі нанесенай маральнай шкоды Леанід запатрабаваў з РУВП "Граніт" 7 мільёнаў рублёў, аднак суддзя Міхаіл Дзянісавіч задаволіў пазоў часткова, абавязаўшы кіраўніцтва прадпрыемства сплаціць актывісту незалежнага прафсаюза 1 мільён рублёў.
