11 снежня Уладзіміра Яроменка возьмуць пад варту
Уладзімір Яроменак
Сёння Уладзiмiру Яроменку паведамiлi дзень яго змяшчэння пад варту. 11 снежня ён павінен з'явіцца ў Першамайскiм РАУС з рэчамi. Адтуль яго даставяць ў турму на Валадарскага.
Па словах актывіста, ён не будзе абскарджваць прысуд, бо гэта зацягнецца на працяглы час, паведамляе прэс-служба "Маладога фронту".
Нагадаем, 20 жніўня2013 году актывіст быў асуджаны на тры месяцы арышту за парушэнне правіл прэвентыўнага нагляду.
Уладзімір Яроменак — фігурант крымінальнай справы аб масавых беспарадках у Мінску 19 снежня 2010 года. Быў прыгавораны да трох гадоў зняволення ў калоніі ўзмоцненага рэжыму, але ў жніўні 2011 года вызвалены на падставе ўказа прэзідэнта аб памілаванні.
Над ім устанавілі прэвентыўны нагляд, пасля чаго Яроменак трапляў у суд двойчы. 27 красавіка 2012 года яго асудзілі на сем сутак адміністрацыйнага арышту за дробнае хуліганства, а 24 студзеня 2013-га — на 12 сутак арышту за парушэнне ўмоў прэвентыўнага нагляду.
Дзеянні ўлад у дачыненні да Яроменка праваабаронцы расцэньваюць як палітычна матываваны націск.
