Пінск: жыхары горада чакаюць ад уладаў больш рашучых дзеянняў у спыненні прапаганды нацызма

На працягу апошніх месяцаў жыхары Пінска рэгулярна бачаць, як на розных будынках і ў месцах адпачынку з’яўляецца свастыка і надпісы нацысцкага зместу.

Спачатку такім чынам быў апаганены помнік ахвярам мясцовага гета, а пасля нацысцкі малюнак з’явіўся на дзвярах аднаго з адукацыйных габрэйскіх цэнтраў. Пазней акт вандалізму здарыўся ў дзіцячым парку Пінска, дзе некалькі выяваў свастыкі можна было назіраць вакол адмыслова пабудаванага замка. Рэакцыя гарадскіх ўладаў з’яівлася толькі пасля зваротаў грамадскасці і паведамленняў журналістаў.

Свастыку і надпісы камунальныя службы зафарбавалі, але праблема не была вырашана.

Гэтымі днямі пінскія жыхары заўважаюць, што сімволіка нацызма пачала з’яўляцца на сценах шматпавярховых дамоў фактычна ў цэнтры горада. Але зноў жа ў гарвыканкаме не спяшаюцца даваць даручэнні адпаведным структурам, каб знішчыць гэтыя малюнкі і прыняць захады ў пошуках тых, хто займаецца прапагандай нацызма.