Юрый Рубцоў ізноў затрыманы, на гэты раз у Гомелі
Юрый Рубцоў, удзельнік "Дзядоў-2013"
У Гомелі раніцай 7 лістапада супрацоўнікі міліцыі затрымалі Юрыя Рубцова. Пра гэта ў facebook паведаміў праваабаронца Леанід Судаленка.
Прыкладна каля 9-30 Рубцоў выйшаў на галоўную плошчу у майцы "За Беларусь без кантрактаў”. Яго адвялі ў міліцэйскі аўтобус, дзе перапісваюць асабістыя дадзеныя. Пры гэтым яму прапанавана пакінуць плошчу.
Пасля гутаркі Юрый Рубцоў быў адпушчаны.
Зараз ён мае намер скласці скаргу на мінскіх міліцыянтаў, якія незаконна сканфіскавалі ў яго майку з надпісам “Лукашенко, уходи”.
Учора Юрый Рубцоў адбыў 3 сутак арышту ў Менску за ўдзел у мітынгу і шэсці ў Курапаты.4 лістапада суд Савецкага раёна Мінска пакараў удзельніка акцыі “Дзяды” Рубцова адміністратыўным арыштам за “непадпарадкаванне” міліцыі. Праваабаронцы лічаць, што насамрэч гэты арышт з’яўляецца помстай за майку з надпісам “Лукашенко, уходи”.
Пры вызваленні Рубцова міліцыя затрымала 9 чалавек.
