У Мінску прайшлі Дзяды (онлайн+фота)
Адбылося традыцыйнае шэсце і мітынг у Курапатах - памяці продкаў, загінулых падчас бальшавіцкага тэрору. Грамадскае назіранне ладзілі праваабаронцы з ПЦ "Вясна" пры ўдзеле БХК ды іншых валанцёраў.
Збор удзельнікаў а 10.30 каля Гадзіннікавага завода (ст. метро «Парк Чалюскінцаў»). З 11.00 да 14.30 — шэсце.
10.50 Шэсце, заяўнікам якога выступае Кансерватыўна-хрысціянскай партыя — БНФ, дазволена ўладамі. На месцы збору каля сотні чалавек. Удзельнікі шэсця трымаюць бел-чырвона-белыя сцягі, партыйную сімволіку, вядомыя па мінулым акцыям транспаранты і расцяжкі.
Назіральнікі, якія знаходзяцца ў пераходзе побач заводам "Луч", паведамляюць, што міліцыянт без бэйджу, запатрабаваў, каб яны пакінулі пераход. Праваахоўнік адмовіўся назваць сваё імя. Міліцыянт патлумачыў, што пераход метро - месца масавага скаплення людзей, таму тут назіраць забаронена.
11.00 Як паведамляе "Радыё Свабода", да ўдзельніка шэсця ў майцы з надпісам «Лукашенко, уходи» падышлі міліцыянты і папрасілі зняць і схаваць майку, каб не было канфліктаў.
11.05 Калона рушыла ў бок Курапатаў. Удзельнікі скандуюць "Жыве Беларусь", спяваюць "Пагоню".
11.20 Назіральнікі падлічылі, што ў шэсці прымае ўдзел 400 чалавек.
11.50 На шэсці няма ніводнага міліцыянта ў форме. Назіральнікі налічылі 60 супрацоўнікаў у штацкім.
12.00 Удзельнікі шэсця дайшлі да Нацыянальнай бібліятэкі. Калона ідзе павольна па тратуары.
12.30 Калона прайшла Лагойскі тракт. Меней за 3 км застаецца да Курапатаў.
14.20 Удзельнікі шэсця дайшлі да Курапатаў. Пачынаецца мітынг. Выступаюць сябры КХП-БНФ.
14.50 Сканчваецца выступленне палітыкаў. Людзі накіроўваюцца ўсталёўваць крыжы.
15.00 Назіральнікі паведамілі, што ў Курапатах былі міліцыянты ў форме, але без імянных бэйджаў. Каля крамы "Суседзі", што на кальцавой, стаяць аўтазакі. Аднак затрыманняў пакуль няма.
15.20 Затрыманы ўдзельнік Юрый Рубцоў. Ён быў апрануты ў майку з надпісам "Лукашенко, уходи". Яшчэ напачатку акцыі міліцыянты папярэджвалі, каб ён зняў майку.
Фота прадастаўленыя грамадскімі назіральнікамі. Глядзіце таксама Маніторынгавую справаздачу па выніках назірання за ходам масавага мерапрыемства "Дзяды - 2013".
