Артыкул 193.1 КК: юрыст Тамара Сяргей не змагла абскардзіць папярэджанне Генпракуратуры
«Пракуратура і суд выканалі ўказанне Адміністрацыі прэзідэнта» - так юрыст Тамара Сяргей расцаніла рашэнне калегіі Мінскага гарадскога суда па грамадзянскіх справах у складзе Вольгі Рамашэўскай, Алы Крапіўкі і Кацярыны Якутовіч, вынесенае 24 кастрычніка. Пасля абвяшчэння гэтага рашэння ўступіла ў сілу вынесенае ёй афіцыйнае папярэджанне Генеральнай пракуратуры аб крымінальнай адказнасці за арганізацыю дзейнасці незарэгістраванага грамадскага аб'яднання.
Касацыйная інстанцыя не выявіла парушэнняў норм матэрыяльнага і працэсуальнага права ў рашэнні суддзі суда Цэнтральнага раёна сталіцы Івана Майсейчыка, які 29 ліпеня не задаволіў скаргу Тамары Сяргей, пацвердзіў законнасць і абгрунтаванасць афіцыйнага папярэджання Генпракуратуры.
Прычым сваё рашэнне калегія Мінгарсуда вынесла, нягледзячы на тое, што юрыст прадставіла неабвержныя сведчанні падтасоўкі фактаў, падробкі доказаў і падмены прадмета даказванн , пакладзеныя ў аснову судовага рашэння.
Каментуючы гэтыя словы Тамара Сяргей адзначыла: «У судовым пасяджэнні 29 ліпеня Генпракуратура прадставіла ў якасці доказу сваёй пазіцыі копію адпраўлення гібрыднай пошты, на якой адсутнічаў мой подпіс. Акрамя таго, паводле службовых паметак паштовага аддзялення № 131 горада Мінска, гэта адпраўленне было выслана 10 ліпеня 2012 года, а атрымана, згодна штампу Адміністрацыі Прэзідэнта Рэспублікі Беларусь, 9 ліпеня 2012 (?). Аднак суд не даў ацэнку, у каго з супрацоўнікаў Адміністрацыі прэзідэнта час рушыў ў зваротным кірунку. З дапамогай гэтага і падобных доказаў Генпракуратура прадставіла мяне лідэрам незарэгістраванага грамадскага аб'яднання і на гэтай падставе вынесла мне афіцыйнае папярэджанне.
Я звярнула ўвагу калегіі Мінгарсуда на тое што людзі адрозніваюцца не толькі узроўнем адукацыі, але таксама норавамі і асаблівасцямі характару. Вось чаму ў любой супольнасці заўсёды ёсць лідэр. Аднак яго наяўнасць у любой групе людзей ніяк не сведчыць аб тым, што дадзеная група людзей з'яўляецца грамадскім аб'яднаннем. У дзяцінстве ўсе чыталі вялікую кнігу Рэд'ярда Кіплінга «Маўглі», дзе аўтар назваў важаком самага аўтарытэтнага ваўка Акелу. Калі ж зыходзіць з логікі чыноўнікаў, то і Акела з'яўляецца кіраўніком грамадскага аб'яднання» .
