Гомельскі каардынатар «Гавары праўду!» просіць пракуратуру пакараць міліцыянераў, якія яго затрымлівалі

Гомельскі каардынатар грамадзянскай кампаніі «Гавары праўду!» Валерый Сляпухін накіраваў скаргу пракурору Кастрычніцкага раёна Мінску з нагоды затрымання 24 жніўня. Нагадаем, 24 жніўня міліцыя прыйшла ў мінскі офіс «Гавары праўду!» і затрымала там каля 30 чалавек, у тым ліку рэгіянальных актывістаў. Затрыманых даставілі ў Кастрычніцкі РАУС сталіцы, а затым адпусцілі.

Заяву на імя пракурора Кастрычніцкага раёна Мінску падрыхтаваў праваабаронца Леанід Судаленка.

У звароце Валер Сляпухін перадае акалічнасці затрымання, у тым ліку, што ён прымусова утрымліваўся ў аддзяленні міліцыі звыш трох гадзін. Пры затрыманні супрацоўнікі міліцыі не прадставіліся, не растлумачылі прычын затрымання, а таксама не склалі і не выдалі пратакол аб фактычным затрыманні.

«За час прымусовага ўтрымання ў Кастрычніцкім РАУС супрацоўнікі міліцыі супраць маёй волі ўзялі ў мяне адбіткі пальцаў, таксама сфатаграфавалі мяне такім чынам, як фатаграфуюць крымінальнікаў. Такія дзеянні я лічу незаконнымі, груба парушаючымі мае правы», - адзначыў у заяве каардынатар.

Ён лічыць, што прымусовае ўтрыманне ў аддзяленні міліцыі на тэрмін звыш трох гадзін з'яўляецца несумяшчальным ў адносінах да павагі яго права на свабоду і асабістую недатыкальнасць, а таксама правоў на прэзумпцыю невінаватасці.

«Супрацоўнікам міліцыі я тлумачыў, што дактыласкапію я прайшоў ва ўстаноўленым парадку, у базе маюцца мае адбіткі пальцаў. Тым не менш, адбіткі пальцаў без дастатковых на гэта падстаў у мяне знялі паўторна. Фатаграфаванне без маёй волі ў анфас і профіль лічу незаконным. Прашу правесці пракурорскую праверку, па выніку якой даць прававую ацэнку кожнаму з названых парушэнняў, прыцягнуць вінаватых у парушэнні заканадаўства асоб да ўстаноўленай адказнасці», - адзначыў у звароце Валерый Сляпухін.