Гарадзенскія праваабаронцы да другой гадавіны зняволення Алеся Бяляцкага падалі заяўку на пікет

   Гарадзенскія праваабаронцы да другой гадавіны зняволення Алеся Бяляцкага падалі ў Гарадзенскі гарвыканкам заяўку на пікет. Заяўка на правядзенне інфармацыйнага пікету ў гарадскім Каложскім парку, якую падпісалі Віктар Сазонаў, Раман Юргель і Уладзімір Хільмановіч, пададзена на 4 жніўня – дзень, калі быў арыштаваны кіраўнік Праваабарончага цэнтру “Вясна” Алесь Бяляцкі.

  Асаблівых спадзяванняў на тое, што правядзенне інфармацыйнага пікету будзе дазволена, у праваабаронцаў няма. У горадзе над Нёманам за апошнія дзесяць гадоў не было аніводнага дазволу на правядзенне аналагічных пікетаў. Летась падавалася аналагічная заяўка на пікет, але Гарадзенскі гарвыканкам не дазволіў інфармаванне жыхароў.