На акцыі ў падтрымку Алеся Бяляцкага ў Магілёве затрыманыя журналісты
23 жніўня у Магілёве адбылася акцыя праваабаронцаў у падтрымку Алеся Бяляцкага, падчас асвятлення якой былі затрыманыя грамадскі актывіст Павел Варашылаў, а таксама журналіст Аліна Скрыбунова і відэааператар Яўген Глушакоў, перадае "Магілёўская вясна". Цягам 2 гадзінаў усіх затрыманых апыталі і адпуцілі без складаньня пратаколаў.
Праваабаронцы і грамадскія актывісты распаўсюдзілі ў цэнтры Магілёва некалькі соцень буклетаў, прысвечаных праваабаронцу Алесю Бяляцкаму, які зараз знаходзіцца пад арыштам і якому пагражае вялікі тэрмін турэмнага зняволення. Напрыканцы акцыі супрацоўнікамі міліцыі быў затрыманыя Павел Варашылаў, а таксама журналісты, што здымалі падзеі, і дастаўленыя ў Ленінскі РАУС г. Магілёва. На іх былі складзеныя апытальныя аркушы.
Аляксей Колчын, магілёўскі праваабаронца пракаментаваў выданню "Тут і цяпер":
- У Магілёве на гэты дзень сабрана больш за сотню паручальніцтваў за Алеся Бяляцкага. Аднак мы сутыкаемся і з тым, што звычайныя грамадзяне мала ведаюць пра сапраўдную сытуацыю з Алесем Бяляцкім, з іншымі палітзняволенымі. Інфармацыйная салідарнасць не менш важная, чым, напрыклад, матэрыяльная. На фоне таго, што пра палітычных зняволеных і пра непасрэдна Алеся Бяляцкага гаворыць беларускае тэлебачанне, асабліва важна даваць людзям прамую і аб'ектыўную інфармацыю пра стан правоў чалавека ў нашай краіне і пра брутальны, недапушчальны для еўрапейскай краіны пераслед сваіх апанэнтаў з боку нашай улады. Такім чынам інфармацыйныя акцыі мы лічым зараз за асноўную ў сваёй дзейнасці. Не кідаючы, зразумела, і ўсіх іншых складнікаў праваабарончай і салідарнай працы.
