У Віцебску судзяць за Дзень Волі (Дапоўнена)
У судзе Кастрычніцкага раёна Віцебска сёньня праходзяць суды над удзельнікамі акцыі прымаркаванай да Дня Волі. Як паведамілі мясцовыя праваабаронцы, у судзе разглядаюцца адміністрацыйныя справы не пяцёх, а шасцёх удзельнікаў акцыі. Суддзя Алена Казілава задаволіла хадайніцтва Леаніда Аўтухова ў перакладчыку і перанесла разгляд на другую палову дня.. На 27 сакавіка перанесены справы Сяргея Каваленкі, Ігара Базарава, Валерыя Аляксандрава. Усіх іх абвінавачваюць у парушэньні артыкула 23.34. КаАП (удзел у несанкцыянаваным масавым мерапрыемстве)
Прысуд над яшчэ двумя ўдзельнікамі Алесем Кузняцовым і Міхасём Гранавым, магчыма, будзе вынесены сёння.
Сяргея Каваленку, Ігара Базарава, Валерыя Аляксандрава, Леаніда Аўтухова і Аляксандра Кузьняцова судзяцьь за ўдзел у несанкцыянаваных акцыях. Удзельнікаў некалькіх акцый, якія ўчора цягам дня прайшлі ў Віцебску, было значна болей, больш за сотню чалавек, але менавіта гэтыя пяцёра хлопцаў разгарнулі на вачох віцебскіх мінакоў бел-чырвона-белыя сьцягі, за што й былі затрыманыя міліцыяй. Пра гэта паведамляе Радыё Свабода.
Мінулую ноч у ізалятары часовага ўтрыманьня мусілі правесьці сябра КХП- БНФ Сяргей Каваленка і ягоны аднадумца Ігар Базараў. Разам з Валерам Аляксандравым гэтыя хлопцы разгарнулі нацыянальныя сьцягі на плошчы Свабоды. Спадара Аляксандрава міліцыянты на ноч не затрымлівалі, бо ён мае інваліднасьць.
З ізалятару часовага ўтрыманьня ў Кастрычніцкі раённы суд прывязуць таксама старшыню раённай суполкі Партыі БНФ з Гарадка Леаніда Аўтухова, які разгарнуў нацыянальны сьцяг ля мэмарыяльнай дошкі Васіля Быкава, куды грамадзкія актывісты прыйшлі ўчора ўвечары, каб ускласьці кветкі.
Віцебскія грамадзкія актывісты і праваабаронцы зьбіраюцца сёньня папрысутнічаць на ўсіх судовых працэсах супраць апазыцыянэраў, каб выказаць зь імі салідарнасьць.
