Заява аб прызнанні сямі чалавек палітычнымі зняволенымі

Сумесная заява прадстаўнікоў беларускай праваабарончай супольнасці

15 красавіка 2025 г.

У сувязі з павелічэннем колькасці выпадкаў асуджэння і пазбаўлення волі грамадзянаў краіны па шэрагу дыфамацыйных артыкулаў Крымінальнага кодэкса Рэспублікі Беларусь, а таксама ў сувязі са знявагай дзяржаўных сімвалаў Рэспублікі Беларусь ды і іншымі дзеяннямі, накіраванымі на правамерную реалізацыю свабоды выказвання меркаванняў, мы, прадстаўнікі беларускай праваабарончай супольнасці патрабуем спыніць пераслед правамерных форм выказвання меркаванняў, і ў  чарговы раз пацвярджаючы свае неаднаразова выказаныя патрабаванні па дэкрыміналізацыі дыфамацыі і недапушчальнасці пазбаўлення волі грамадзян за абразу службовых асобаў, дзяржавы, дзяржаўных органаў і сімвалаў (супольная заява ад 22 снежня 2020 г.), адзначаем наступнае:

Намі атрыманая інфармацыя пра наступных асобаў, пазбаўленых волі за абразу А. Лукашэнкі, прадстаўнікоў улады (супрацоўнікаў міліцыі), суддзяў і знявагу дзяржавы і дзяржаўных сімвалаў, іншыя формы рэалізацыі свабоды мяркаванняў:

1. Генадзь Іванчыкаў асуджаны за паклёп на А. Лукашэнку па арт. 367 Крымінальнага кодэкса да двух гадоў пазбаўлення волі ў папраўчай калоніі;
2. Аляксей Семянок асуджаны за абразу А. Лукашэнкі па арт. 368 КК да аднаго года і 6 месяцаў пазбаўлення волі ў папраўчай калоніі;
3. Ігар Драбышэўскі асуджаны за заклікі да пратэстаў па арт. 361 КК да пазбаўлення волі ў папраўчай калоніі;
4. Дзяніс Белаголаў асуджаны за абразу прадстаўніка ўлады па арт. 369 КК да абмежавання волі, адбывае пакаранне;
5. Наталля Белакурская асуджана за абразу А. Лукашэнкі і прадстаўніка ўлады па арт. 368, 369  КК да пазбаўлення волі ў папраўчай калоніі;
6. Мікалай Снытко асуджаны за абразу А. Лукашэнкі, прадстаўніка ўлады і суддзі па арт. 368, 369, 391 КК да пазбаўлення волі ў папраўчай калоніі;
7. Аляксандр Горбель асуджаны за абразу А. Лукашэнкі па арт. 368 КК да пазбаўлення волі ў папраўчай калоніі.

Мы лічым пераслед і пазбаўленне волі названых асоб палітычна матываваным, звязаным з мірнай рэалізацыяй выказвання меркавання, а іх саміх палітычнымі зняволенымі ў адпаведнасці з п. 3.1(а) Кіраўніцтва па вызначэнні паняцця “Палітычны зняволены”, і патрабуем ад уладаў Беларусі:

1. Неадкладнавызваліць палітвязняў Генадзя Іванчыкава, Аляксея Семянка, Ігара Драбышэўскага, Дзяніса Белаголава, Наталлю Белакурскую, Мікалая Снытко, Аляксандра Горбеля і спыніць крымінальны пераслед у дачыненні да іх.
2. Прыняць захады, скіраваныя на дэкрыміналізацыю дыфамацыйных правапарушэнняў і адмену артыкулаў Крымінальнага кодэкса, якія прадугледжваюць адказнасць за абразу дзяржавы, дзяржаўных сімвалаў і службовых асобаў, а менавіта – арт. 188, 189, 367, 368, 369, 369-1, 370, 391 Крымінальнага кодэкса Рэспублікі Беларусь, і спыніць усе раней узбуджаныя па дадзеных артыкулах крымінальныя справы.
3. Неадкладна вызваліць усіх палітычных зняволеных і спыніць палітычныя рэпрэсіі супраць грамадзян краіны.

Праваабарончы цэнтр "Вясна";

Прававая ініцыятыва;

Lawtrend;

Respect-Protect-Fulfill;

Беларускі ПЭН;

Беларускі дом правоў чалавека імя Барыса Звозскава;

Беларускі Хельсінкскі камітэт;

Беларуская асацыяцыя журналістаў.