Ціск на ўдзельнікаў акцый да Дня Волі і ператрусы КДБ у прадстаўнікоў прафсаюзаў: хроніка пераследу 27-28 сакавіка Дапоўнена

У Беларусі не спыняюцца затрыманні, ператрусы, катаванні ў ізалятарах, аказваецца ціск на палітвязняў, незалежныя медыяпрадукты прызнаюць "экстрэмісцкімі матэрыяламі і фармаваннямі". Праваабарончы цэнтр "Вясна" 27-28 сакавіка 2025 году збірае факты палітычнага пераследу беларусаў і беларусак. 

У "Спіс экстрэмістаў" дадалі яшчэ 15 прозвішчаў — цяпер у ім 5088 чалавек

28 сакавіка МУС зрабіла традыцыйны пятнічны апдэйт "Пераліка грамадзян Беларусі, замежных грамадзян або асоб без грамадзянства, якія маюць дачыненне да экстрэмісцкай дзейнасці".

Сярод іншых, у спіс дадалі грамадзяніна Украіны Канстанціна Панамарова, беларуса-эмігранта Руслана Зубкова, а таксама фігуранта справы "Кадравага рэзерву для новай Беларусі" Аляксандра Куксу.

Праваабаронцам стала вядома пра ператрусы КДБ у прадстаўнікоў прафсаюзаў

28 сакавіка стала вядома, што ў "прафсаюзнікаў" канфіскавалі тэхніку, але пасля допытаў адпусцілі. Паведамляецца, што сілавікоў цікавілі сувязі з BySOL і ByHelp, а таксама ў людзей пыталіся пра гэтак званае "фінансаванне тэрарыстычнай дзейнасці".

Па вяртанні з Польшчы затрымалі 64-гадовую жанчыну — яна ў СІЗА за ўдзел у пратэстах

Жанна Вайніловіч

Праваабаронцам стала вядома 28 сакавіка пра затрыманне напрыканцы студзеня Жанны Вайніловіч. Вядома, што жанчына вярталася ў Беларусь з Польшчы і была затрыманая не на мяжы, а праз некалькі дзён пасля гэтага.

Ёй інкрымінуюць "народны" арт. 342 КК (актыўны ўдзел у дзеяннях, якія груба парушаюць грамадскі парадак) за нібыта ўдзел у паслявыбарчых акцыях пратэсту. Яна знаходзіцца ў СІЗА.

Раім сур'ёзна ацэньваць рызыкі перад паездкай у Беларусь і не забываць пра правілы бяспекі — не захоўваце фота з акцый пратэсту, каб не нашкодзіць сабе і іншым удзельнікам пратэстаў. Акрамя таго, уважліва праглядзіце падпіскі ў сваіх усіх сацсетках на наяўнасць "экстрэмісцкіх" старонак, а таксама "лайка"» і каментароў на іх.

Віцебскія сілавікі знайшлі «прыкметы распаўсюду экстрэмізму» ў прарасійскага актывіста

Актывіст з Віцебску Дзмітрый Карняенка атрымаў адказ з АУС Чыгуначнага раёна, дзе пазначана, што ў дзеяннях Сяргея Лашкова "угледжваюцца прыкметы складу адміністрацыйнага правапарушэння, прадугледжанага ч. 2 арт. 19.11 КаАП (распаўсюд экстрэмізму)".

Як паведаміў тэлеграм-канал "Витебск, я гуляю!", Сяргей Лашкоў — вядомы тым, што актыўна прасоўвае прарасійскія ідэі сярод мясцовых жыхароў. У цяперашні час ён выдаліў частку сваіх сацсетак.

Прапагандысты заявілі, што сілавікі ідэнтыфікавалі 260 удзельнікаў замежных акцый да Дня Волі

Здымак мае ілюстрацыйны характар

Як паведамілі прапагандысты 28 сакавіка, сілавікі ідэнтыфікавалі ўдзельнікаў акцый у Беластоку, Познані, Варшаве, Уроцлаве, Вільні, Берліне, Філадэльфіі, Чыкага, Альберце і Маямі.

Сцвярджаецца, што 98 удзельнікаў акцый раней не траплялі ў поле зроку сілавікоў.

У Гродна затрымалі Мікіту Самарына, які 4 гады хаваўся ад прысуду

Мікіта Самарын

Пра гэта паведаміў 27 сакавіка тэлеграм-канал "Право имеют". Як паведаміла Міністэрства ўнутраных спраў, мужчыну спынілі ў Гродне — дакументаў пры ім не было, таму яму прапанавалі прайсці ў пастарунак. Беларус аказаў супраціў міліцыянтам і, як сцвярджаецца, зламаў аднаму з іх руку. Паведамляецца, што мужчына быў у вышуку за тое, што ў жніўні 20-га году нібыта "распыліў у твар праваахоўнікам газавы балончык". За гэта супраць яго распачалі крымінальную справу. Ён з'ехаў з краіны, але потым нелегальна вярнуўся ў Беларусь.

Нагадаем, у снежні 2020 года яго асудзілі да 4 гадоў "хіміі" за тое, што ён нібыта распыліў газ у твар амапаўцу 25 жніўня 2020 года.

Пасля затрымання 5 кастрычніка 2020 года Мікіту кінулі ў мікрааўтобус у кайданках, зацягнутых вышэй кісцяў на запясце — у яго засталіся шнары ад рэзаных ран. Прама ў аўтобусе Самарыну нажом абрэзалі доўгія валасы. У ГУБАЗіКу яму загадалі даць паказанні пад пагрозай вывезці ў лес і завядзеннем крымінальнай справы на затрыманага з ім сябра. У сакавіку 2021-га году хлопцу замянілі прысуд на 2,5 года калоніі. Сам Мікіта ў суд не з’явіўся.

Чарговае папаўненне Спіса экстрэмісцкіх матэрыялаў

Эрні Барбараш

У яго трапілі:

• Instagram старонкі "businessladies_abroad", "oh_by", "Centrum obslugi cudzoziemcow Irina Vorochkova";
• Старонка ў Facebook "Alliance of Belarusian Business Ladies – ABBL";
• Старонкі ў "Аднакласніках" "Нас 97 ПРОЦЕНТОВ!", "Ликбез па Беларуску", "Светлана Тихановская", "Мы в Пинске", "Ликбез па Беларуску";
• Старонка ў TikTok "volya.bу".
• Telegram-каналы і чаты "Wild Division", "РОНІНИ", "Беларусы Познані ׀ Poznan", "Беларускі інстытут публічнай гісторыі", "СЧТН", "BY_UA акции и события белорусов в Украине";
• YouTube-канал "Вячеслав Вячеславович Яковчик";
• Старонкі ва "Укантакце" "Федор Шмиголь", "Беларусь/Новости/NEXTA Live";
• Старонкі ў "Х" "JP", "Барыс Фішар", "БЕЛА(вешкін анд)РУСЬ", "Вестник бури", "Русофобия в Беларуси", "Вячаслау Сікора", "Артемий Троицкий", "АГ-Астрахвізык Глыбоччыны", "Petrenko Andryi (Ukraine)";

Таксама прызналі старонку ў "Х" амерыканскага кінарэжысёра, які падтрымлівае беларускіх палітвязняў

Гаворка пра старонку Эрні Барбараша.

Эрні — амерыканскі кінарэжысёр, сцэнарыст і прадзюсер. Амаль кожны дзень у сваім «Х» і іншых сацсетках ён публікуе кароткую гісторыю аднаго з беларускіх палітвязняў і спосабы іх падтрымкі. Кінарэжысёр таксама далучыўся да Дня салідарнасці з палітзняволенымі Беларусі і зрабіў мазаіку з карціны "Узяцце Бастыліі", выкарыстаўшы фотаздымкі вязняў.