Хто той куратар КДБ, які прапаноўваў настаўніцы даносіць на калегаў? Распавядаем

Настаўніца матэматыкі Ляхавіцкай гімназіі Таццяна Крапіневіч напрыканцы 2024 года вымушана з’ехала з краіны пасля даносаў Бондаравай. Яна расказала "Вясне", як пасля допыту КДБ ёй тэлефанаваў куратар ведамства і прапаноўваў даносіць на калегаў. Распавядае, што атрымалася высветліць пра асобу куратара. 

Пай Аляксандр Васільевіч

Як паведаміла Таццяна, куратар прадставіўся, як Пай Аляксандр Васільевіч. Настаўніца запісала яго нумар тэлефону.

"Ён сказаў, што ведае, што я пакідала на выбарах подпіс за Віктара Бабарыку. "Да, было такое, што ў гэтым дрэннага?". Ён мне даў зразумець, што калі я штосьці пабачу ці пачую падазронае, то магу ў любы час днём і ноччу яму патэлефанаваць. То-бок, ён мне прапанаваў данасіць на іншых", – распавяла ў інтэрв’ю Таццяна.

"Страху ў школе значна паболела". Пасля размовы з КДБ у настаўніцы пачаліся панічныя атакі

Настаўніца матэматыкі з Ляхавічаў Таццяна Крапіневіч вымушаная была бегчы з Беларусі пасля паклёпніцкіх публікацый даносчыцы Вольгі Бондаравай. Зімою 2024 года да Таццяны на працу прыйшлі міліцыянты, калі тая знаходзілася ў мінскім шпіталі. Яны паказвалі скрыншоты пастоў у сацсетках жанчыны за 2020 год. Таццяна за суткі сабрала рэчы і з’ехала з краіны разам з дачкой. Некалькі месяцаў яны вымушаныя былі жыць у розных краінах, пакуль сёлета ў студзені не пераехалі ў Польшчу.

Мы з дапамогай "Белпола" знайшлі чалавека з такім самым імём.

Па стане на 2017 год Аляксандр Пай працаваў у вайсковай часці № 13279 – гэта Упраўленне КДБ па Брэсцкай вобласці. 35-гадовы мужчына – ўраджэнец Драгічына і мае ва ўласнасці кватэру ў Баранавічах.  

Як атрымалася высветліць, Пай двойчы прыцягваўся да адміністрацыйнай адказнасці за перавышэнне хуткасці і парушэнне правілаў паркоўкі.

Нумар тэлефона, з якога тэлефанавалі настаўніцы, зарэгістраваны на 32-гадовую Пай Вольгу Васільеўну. Яе апошняе месца працы – Цэнтральная раённая бібліятэка горада Іванава.