Першае затрыманне пасля доступу сілавікоў да бота "Беларускага Гаюна" : хроніка пераследу 7 лютага Дапоўнена

У Беларусі не спыняюцца затрыманні, ператрусы, катаванні ў ізалятарах, аказваецца ціск на палітвязняў, незалежныя медыяпрадукты прызнаюць "экстрэмісцкімі матэрыяламі і фармаваннямі". Праваабарончы цэнтр "Вясна" 7 лютага 2025 году збірае факты палітычнага пераследу беларусаў і беларусак. 

У Віцебску за "распаўсюд экстрэмізму" зноў судзілі студэнта — трэцякурсніка мясцовага "МІПСА" Андрэя Салодкіна

Хлопец вучыцца на аддзяленні "Лагістыка", паведаміла "Віцебская вясна". 

Сёмага лютага яго справу ў судзе Кастрычніцкага раёна Віцебска разбірае суддзя Ганна Кот. Салодкіна вінавацяць у "распаўсюдзе экстрэміскай інфармацыі" (ч. 2 арт. 19.11 КаАП) і ў "прапагандзе нацысцкай сімволікі" (ч. 1 арт. 19.10 КаАП).

Шостага лютага тая ж суддзя Ганна Кот за "распаўсюд экстрэмізму" асудзіла студэнта Ёэля Юроўскага.

У "Спіс экстрэмістаў" дадалі яшчэ 30 чалавек — цяпер у ім 4930 прозвішчаў

Міністэрства ўнутраных справаў сёмага лютага зрабіла традыцыйны пятнічны апдэйт "Пераліка грамадзян Беларусі, замежных грамадзян або асоб без грамадзянства, якія маюць дачыненне да экстрэмісцкай дзейнасці".

Сярод іншых, у спіс дадалі фігурантаў "справы Мачулішчаў" Мікалая Швеца (у спісе МУС — грамадзянін РФ), украінку Алу Яцуту і расіяніна Алега Сычова, сябра руху "За Свабоду" Аляксея Клюшнічэнку, жыхара Брэста Віталя Чопіка.

У Рагачове былую палітзняволеную двойчы асудзілі за "распаўсюд экстрэмізму"

Юлія Касцючэнка

У судзе Рагачоўскага раёна пятага лютага суддзя Ірына Зыль разглядала адміністрацыйную справу ў дачыненні да мясцовай жыхаркі Юліі Касцючэнка. Жанчыну абвінавачвалі паводле ч. 2 арт. 19.11 КаАП (распаўсюд экстрэмісцкіх матэрыялаў).

22 студзеня Юлію ўжо судзілі паводле ч. 2 арт. 19.11 КаАП (распаўсюд экстрэмісцкіх матэрыялаў). Вынік мінулага і новага суда пакуль невядомы, паведаміла "Гомельская вясна". 

Напачатку 2023-га году Юліі прызначылі 1 год калоніі за "абразу Лукашэнкі" — паводле следства, жанчына на сваёй старонцы ў сацыяльнай сетцы «Інстаграм» размяшчала допісы і відэазапісы, якія "ўтрымлівалі абразу на адрас Лукашэнкі". Жанчынца цалкам адбыла свой тэрмін.

Першае вядомае затрыманне пасля атрымання сілавікамі доступу да бота "Беларускага Гаюна"

Максім Нікіценка

Ініцыятыва Digital Intelligence Team са спасылкай на праўладныя тэлеграм-каналы паведаміла, што быў затрыманы 42-гадовы Максім Нікіценка. У апошнія гады ён працаваў на Мазырскім нафтаперапрацоўчым заводзе. У Максіма ёсць жонка і двое дзяцей.

Чарговае папаўненне Спіса экстрэмісцкіх матэрыялаў

Вокладка группы "Укантакце" "Родная мова", прызнаная "экстрэмісцкімі матэрыяламі"

У яго трапілі:

• Telegram-канал "Беларуская служба Польскага радыё ǀ Polskie Radio dla Zagranicy";
• Instagram старонка "alena.davidovich", "acameron375", "belarus_en_france", "belarusses2savoies", "alice_syal", "bypolskieradio", "МУЗЕЙ ВОЛЬНАЙ БЕЛАРУСІ", "Пра Вiцебск";
• Сайт "ukr.nеt";
• Youtube-канал "Народны дэпутат";
• Старонкі ў сацсетках "Незалежны прафсаюз РЭП";
• Старонка ва "Укантакце" "Родная Мова".