За наезд на даішніка пракурор просіць пакараць Аляксандра Троцкага 11 гадамі калоніі Дапоўнена
Аляксандр Троцкі ў судзе 24 лютага. Фота: "Белсат"
Мінскі гарадскі суд працягвае разгляд крымінальнай справы за замах на забойства супрацоўніка органаў унутраных справаў (арт. 14 арт. 362 Крымінальнага кодэкса) супраць 45-гадовага бізнэсмена Аляксандра Троцкага. Паводле абвінавачвання, ён правёз 12 жніўня на капоце сваёй машыне супрацоўніка ДАІ Уладзіміра Юрава, у выніку чаго той атрымаў цялесныя пашкоджанні, якія не пацягнулі за сабой кароткачасовага расстройства здароўя. Па словах Троцкага, яго машыну беспрычынна спынілі людзі ў цёмным і балаклавах, а калі той, баючыся за сваё жыццё, адмовіўся выйсці з машыны, супрацоўнік ДАІ "дастаў баявую зброю і накіраваў у яго бок, прыцэліўся прама ў галаву". Справа разглядаецца пад старшынствам суддзі Сяргея Хрыпача. Сёння ў судзе адбываюцца спрэчкі бакоў.
Пракурор Антон Цюменцаў лічыць, што віна Аляксандра Троцкага па арт. 14 арт. 362 Крымінальнага кодэкса цалкам даказаная, яго намер быў накіраваны менавіта на забойства пацярпелага супрацоўніка ДАІ Уладзіміра Юрава. На думку пракурора, дзеянні Троцкага кваліфікаваныя правільна. Дзяржабвінаваўца папрасіў суд прызначыць Троцкаму пакаранне ў выглядзе 11 гадоў пазбаўлення волі ва ўмовах узмоцненага рэжыму, а пазоў пацярпелага ў 20 тысяч рублёў задаволіць у межах разумнага.
Абаронца Троцкага: Мэтай наезду была не спроба забойства, а спроба схавацца з месца, дзе яму пагражала небяспека
Адвакат Аляксандра Троцкага Яўген Маслаў прыходзіць да высновы, што дастатковых доказаў здзяйснення злачынства абвінавачванне не прадаставіла. Не прадстаўлена і доказаў на тое, што быў прамы намер.
"Усе дзеянні былі накіраваныя на тое, што Троцкі баяўся за сваё жыццё".
Як адзначае адвакат, у пратаколе допыту супрацоўніка ДАІ Юрава ад 14 жніўня ёсць фраза: "Супрацоўнік АМАП, які стаяў побач са мной і сказаў, каб Троцкі заглушыў даігальнік, выйшаў з машыны і падаў свой мабільны тэлефон". Гэта была сапраўдная прычына прыпынку. У супрацоўнікаў АМАП няма такіх паўнамоцтваў, таму Троцкі мог законна не падпарадкоўвацца гэтаму патрабаванню. Маслаў адзначае, што ад Юрава патрабаванняў Троцкаму не паступала, а ад супрацоўніка АМАП патрабаванні былі незаконныя. Акрамя гэтага, у супрацоўнікаў унутраных спраў не было законных падстаў на прымяненне зброя: інспектарам былі парушаныя пункты загаду 155.
Таксама адвакат звяртае ўвагу, што з паказанняў Кароты вынікае, што ў яго была медыцынская маска і галаўны ўбор. Але на прагледжаных відэа было відаць, што ўсе знаходзяцца там былі ў балаклавах.
Сведка Казлоў (былы супрацоўнік АМАПа) адзіны, хто выразна бачыў момант наезду аўтамабіля. На яго думку, вынік падзення быў звязаны з выкручваннем колаў падабаронным налева.
Адвакат падкрэслівае, што мэтай наезду была не спроба забойства, а спроба схавацца з месца, дзе яму пагражала небяспека.
На думку абароны, так як у дадзеным выпадку няма намеру, то Троцкі падлягае апраўдання, бо няма ў яго дзеяннях складу злачынства.
Аляксандр Троцкі ў апошнім слове: Я не ведаў, што супрацоўнікі міліцыі могуць несці службу са ўтоенымі асобамі і ў балаклавах
45-гадовы бізнэсмен Аляксандр Троцкі ў апошнім слове сказаў, што ніколі ўявіць не мог, што можа апынуцца ў такой сітуацыі:
"Праглядаючы відэа, я бачыў, як беспадстаўна збіваюць людзей, і я не ведаў, што супрацоўнікі міліцыі могуць несці службу са схаванымі тварамі і ў балаклавах, без адметных знакаў. Калі цябе спыняюць людзі са схаванымі тварамі і зброяй без тлумачэння прычын, накіроўваюць баявую зброю ў мой бок, то я, безумоўна, спалохаўся. У мяне было адно жаданне — проста з'ехаць адтуль. Я ў прынцыпе не мог сабе прадстваіць, што такое магчыма і такое можа быць".
Абвяшчэнне прысуду прызначанае на 5 сакавіка ў 10:00.
Падрабязна пра суд над Аляксандрам Троцкім мы пісалі тут:
Без відэадоказаў і па намаляваных схемах АМАПаўцаў. Як судзяць за наезд на ДАІшніка мінчука, якому пагражае да 25 гадоў калоніі
"Супрацоўнік ДАІ дастаў баявую зброю і накіраваў у мой бок". Мінчука судзяць за замах на забойства супрацоўніка
