На студэнта завялі крымінальную справу за заклікі да страйку
На 21-гадовага студэнта БДУІР распачатая крымінальная справа аб арганізацыі і падрыхтоўцы дзеянняў, якія груба парушаюць грамадскі парадак (артыкул 342 Крымінальнага кодэкса). Пра гэта паведаміла прэс-служба МУС. Вядома, што студэнт затрыманы. Па інфармацыі телеграм-канала «Мірны БДУІР», затрыманага студэнта завуць Арцём Вінакураў.
- Студэнт Арцём Вінакураў
Студэнт вучыцца на 3 курсе факультэта кампутарных сістэм і сетак БДУІР. Паводле звестак МУС, 26 кастрычніка ён разам з іншымі навучэнцамі зайшоў у аўдыторыю, дзе праходзіў занятак, і пачаў заклікаць да страйку. Пасля таго, як дэкан факультэта інфармацыйных тэхналогій і кіравання Леанід Шылін зрабіў заўвагу студэнтам і папрасіў іх выйсці з аўдыторыі "у яго адрас пасыпаліся абразы і пагрозы".
На відэа, апублікаваным МУС, чуваць, як Шылін просіць студэнтаў пакінуць кабінет. На гэта адзін з маладых людзей адказвае: "Мы не ў першабытным грамадстве". Далей у відэа прыкметна злепванне, пасля чаго затрыманы студэнт, звяртаючыся да студэнтаў у аўдыторыі, пытаецца: "Вы хочаце, каб вось такія людзі кіравалі вамі? Вы хочаце, каб працягвалася беззаконьне на вуліцах?". Шылін запярэчыў: "Навошта вы блытаеце" такія людзі" і "беззаконне"?" і сказаў, што яго задача — вучыць людзей.
На відэа прэс-службы МУС студэнт сказаў, што яго дзеянні каардынаваў невядомы чалавек праз телеграм, і папрасіў прабачэння перад дэканам Леанідам Шыліным.
