Праваабарончы цэнтр «ВЯСНА»

21.09.2012 Жодзіна: для назіральнікаў ад БРСМ “закон не пісаны”

У прадстаўніцы БРСМ зусім не аказалася з сабою неабходнай копіі пратаколу ад сваёй арганізацыі. Яна патлумачыла, што ўсе дакументы знаходзяцца ў выканкаме. Нягледзячы на адсутнасць неабходнага дакумента, старшыня камісіі пачала акрэдытоўваць прадстаўніцу БРСМ у якасці назіральніка.

21.09.2012 За тры дні датэрміновых выбараў прагаласавалі 12,5% выбаршчыкаў

Сакратар Цэнтрвыбаркама Мікалай Лазавік паведаміў, што з Брэсцкай вобласці прагаласавала 11,4% выбаршчыкаў (за два дні - 6,5%), Віцебскай -14,7% (8,2%), Гомельскай - 13,8% (7, 9%), Гродзенскай - 11,7% (6,3%), Мінскай - 10,9% (6,4%), Магілёўскай - 14,1% (8,1%), Мінску - 11,8% (7,1%).

21.09.2012 Вынікі назірання за трэцім днём датэрміновага галасавання

Амаль на трэцяй частцы ўчасткаў, дзе прысутнічаюць назіральнікі кампаніі "Праваабаронцы за свабодныя выбары", зафіксавана адрозненне колькасці прагаласаваўшых за дзень паміж афіцыйнымі дадзенымі і дадзенымі назіральнікаў. Амаль на 20% участкаў прысутнічаюць пабочныя асобы.

20.09.2012 Гомель: цікавішся яўкай – пакінь участак

20 верасня з участка №3 Гомельскай-Цэнтральнай акругі №33, які месціцца ў сярэдняй школе №19, былі выдалены два назіральнікі – Андрэй Цянюта і Андрэй Жалезнічэнка.

20.09.2012 Светлагорскі раён: шасцёх партыйных назіральнікаў знялі з участкаў

У Светлагорскім раёне шасці партыйным назіральнікам адмоўлена ў праве працягваць назіранне. Яны былі накіраваны на выбарчыя ўчасткі ад раённай арганізацыі партыі “Справядлівы свет”. Сяргей Дайнека, прадстаўнік гэтай партыі, вылучаецца тут кандыдатам у дэпутаты.

20.09.2012 Гародня: масавае галасаванне на “студэнцкім” участку

Масавы “загон” студэнтаў на датэрміновае галасаванне зафіксаваны на ўчастку №13 Гарадзенскай-Цэнтральнай акругі №50. Гэты ўчастак размяшчаецца ў інтэрнаце Гарадзенскага дзяржаўнага медыцынскага каледжу.

20.09.2012 Віцебск: назіральнікі вымушаны "бачыць скрозь сцены"

Старшыня ўчастковай выбарчай камісіі №52 Віцебскай-Чкалаўскай выбарчай акругі Ніна Шубіна не дапусціла назіральнікаў у памяшканне для галасавання. Стол для іх паставілі ў суседнім пакоі.

20.09.2012 Мінск: студэнтаў на галасаванне заганяюць у час заняткаў

У Міжнародным дзяржаўным экалагічным універсітэце імя Сахарава іншагароднім студэнтам “прапанавалі” прагаласаваць датэрмінова замест заняткаў. У Беларускім дзяржаўным універсітэце культуры і мастацтва датэрмінова прагаласаваўшым абяцаюць дадатковыя выходны. А ў Мінскім інстытуце кіравання дэканы кантралююць іншагароднікаў.

20.09.2012 Амбасада Беларусі ва Украіне адмовілася рэгістраваць незалежнага назіральніка

Старшыня выбарчай камісіі консул Юрый Слука абгрунтаваў рашэнне тым, што пастанова ЦВК адносна рэгістрацыі назіральнікаў не датычыцца выбарчых участкаў, якія знаходзяцца за межамі Беларусі. Аднак гэта не адпавядае рэчаіснасці і з’яўляецца парушэннем заканадаўства.

20.09.2012 Гародня: падвышаная актыўнасць выбаршчыкаў

У Гародні адзначана неверагодна падвышаная актыўнасць грамадзянаў падчас датэрміновага галасавання. На ўчастках, дзе няма незалежных назіральнікаў, лічбы прагаласаваўшых увогуле “зашкалілі”.

20.09.2012 Вынікі назірання за другім днём датэрміновага галасавання

На 31,5% выбарчых участкаў, на якіх прысутнічаюць назіральнікі кампаніі "Праваабаронцы за свабодныя выбары", фіксуецца адрозненне колькасці прагаласаваўшых за дзень паміж афіцыйнымі дадзенымі і дадзенымі назіральнікаў.

20.09.2012 Рагачоў: у выбарчых бюлетэнях - “За Дашкевіча!”

На адным з участкаў для галасавання адбыўся ў літаральным сэнсе скандал: жанчына, якая прыйшла на датэрміновае галасаванне, была абураная тым, што ў бюлетэні няма прозвішча прадстаўніка кампаніі “Гавары праўду!” Дзяніса Дашкевіча, якога не зарэгістравалі кандыдатам.

20.09.2012 Пінск: Кандыдатка пайшла ў “інфармацыйны наступ”

Прычым ўсё гэта зроблена з парушэннем рашэння Пінскага гарвыканкама № 918, згодна з якім не дазваляецца вывешваць агітацыйныя матар’ялы ў вітрынах крамаў і іншых недазволеных месцах, а дазволена гэта рабіць толькі на інфармацыйных стэндах прадпрыемстваў і установаў.

20.09.2012 Мінск: выбаршчыкі з інтэрнатаў пад пільнай увагай

Назіральніца зафіксавала факт тэлефоннай размовы паміж старшынёй выбарчай камісіі і невядомым чалавекам з наступным зместам: “Патэлефаную Манцэвіч, каб інтэрнат прыйшоў”. Апроч таго, кіраўніцтва камісіі ўвесь час перадае па тэлефоне інфармацыю пра тое, колькі жыхароў інтэрнату каледжу прагаласавалі.

20.09.2012 На датэрміновым галасаванні ў Віцебску прапануюць узважыцца і памерыць ціск

Бясплатныя медычныя паслугі – адзін са сродкаў завабіць выбаршчыкаў на датэрміновае галасаванне, лічыць Сяргей Парсюкевіч, давераная асоба кандыдата па Віцебскай Чкалаўскай выбарчай акрузе №18 Аляксей Гаўруцікава. Перасоўны "медпункт" каля ўчастка для галасавання ён заўважыў у сярэдняй школе №42.