Праваабарончы цэнтр «ВЯСНА»

Навіны за Верасень 2012

05.09.2012 ЦВК лічыць галоснасць і празрыстасць выбарчага працэсу неабавязковымі

Цэнтральная выбарчая камісія канстатуе, што “нормы выбарчага заканадаўства не абавязваюць старшыню, а таксама членаў (акруговай) камісіі прадстаўляць для азнаямлення назіральнікам дакументы, якія трапілі ў (акруговую) камісію.”

05.09.2012 Кандыдату Аляксею Гаўруцікаву вярнулі забраныя рэчы

Некалькі дзён таму супрацоўнікі ДПС правялі ператрус у машыне, дзе ехаў спадар Гаўруцікаў, і забралі кампутарныя дыскі, "Народную праграму" і папку з дакументамі. Пасля скаргі ў пракуратуру спадара Гаўруцікава запрасілі ў Першамайскі РАУС, вярнулі рэчы і запэўнілі, што ідзе пракурорская праверка законнасці дзеянняў тых, хто праводзіў затрыманне машыны.

05.09.2012 У Рэчыцы агітацыю вядзе толькі адзін кандыдат

На інфармацыйных стэндах Рэчыцы з’явіліся першыя агітацыйныя плакаты па выбарах у Палату прадстаўнікоў, і належаць яны толькі аднаму з тутэйшых кандыдатаў у дэпутаты. Агітацыйных пікетаў пакуль не відаць. Між тым, з пачатку агітацыйнага перыяду прайшло ўжо 2 тыдні.

05.09.2012 Бацьку і брата Уладзіміра Трызунова дапыталі невядомыя

У панядзелак, 3 верасня, двое людзей у цывільным з’явіліся дадому да магілёўскага актывіста Уладзіміра Трызунова, аднак не засталі яго дома. Невядомыя не прадставіліся, аднак пачалі дапытваць брата і бацьку актывіста. Уладзімір Трызуноў, працуючы звычайным грузчыкам на хлебзаводзе №4, сфатаграфаваў і выклаў у інтэрнэт фотаздымкі расталага маргарыну.

05.09.2012 Вярхоўны суд прызнаў нерэгістрацыю Міхаіла Васільева правамернай

На паседжанні суда прысутнічаў старшыня акруговай камісіі Барысаўскай сельскай выбарчай акругі № 63 Леанід Навіцкі. «Пасля паседжання мы размаўлялі з Навіцкім, - распавядае Васільеў. - Я сказаў яму, што мая перамога ў судзе была адзін да дзевяноста дзевяці. Ён засмяяўся і пагадзіўся».

05.09.2012 Зэльва: умовы для агітацыйнай кампаніі застаюцца няроўнымі

У СВК “Караліно” Зэльвенскага раёна на сустрэчы з кандыдатамі Іванам Шэгам і Міхаілам Караткевічам ніхто з выбаршчыкаў не прыйшоў. Замест сваіх аб’яў пра сустрэчы яны ўбачылі толькі каляровыя афішы праўладнага кандыдата Алы Сопікавай.

05.09.2012 Гарадзенскія дэмакратычныя кандыдаты скардзяцца ў ЦВК на абмежаванне месцаў для агітацыі

Дэмакратычныя кандыдаты ад розных партый і рухаў лічаць, што існуючы пералік месцаў не дазваляе ў поўнай меры рэалізаваць правы кандыдатаў на сустрэчы з выбарцамі на сходах у зручнай для выбарцаў форме, якая прадугледжана артыкулам 45 Выбарчага кодэксу.

05.09.2012 Барысаў: прадстаўнікі БДІПЧ АБСЕ сустрэліся з праваабаронцамі

Вялікую цікавасць у замежных назіральнікаў выклікала інфармацыя пра тое, што ў рамках выбарчай кампаніі патэнцыйны на той момант кандыдат Леў Марголін і кіраўнік яго ініцыятыўнай групы Міхаіл Васільеў былі асуджаныя па адміністрацыйнай справе і атрымалі мільённыя штрафы.

05.09.2012 Затрыманы актывіст «Zмены» Ягор Віняцкі

5 верасня каля 13-30 ў кватэру да актывіста моладзевага крыла кампаніі «Гавары праўду» - «Zмена» Ягору Віняцкаму прыйшлі супрацоўнікі міліцыі.

05.09.2012 Гомельшчына: назіральнікі ад СНД хваляць выбары, ад БДІПЧ АБСЕ – устрымліваюцца ад ацэнак

Варта зазначыць, што, напрыклад, назіральнік ад СНД Іван Катлабай працаваў у Гомельскай вобласці і на прэзідэнцкіх выбарах у снежні 2010 года. І тады таксама не заўважыў ніякіх парушэнняў заканадаўства.

05.09.2012 Старшыня акруговай камісіі: “Паседжання не будзе, таму што... я перадумала”

Прыйшоўшы 4 верасня на паседжанне камісіі Маладэчанскай гарадской акругі, аб якім загадзя паведамляла абвестка, назіральнік даведаўся, што паседжанне не адбудзецца. Спытаўшыся ў старшыні камісіі Святланы Юрчык пра прычыны яго адмены ці пераносу, ён пачуў: “Паседжання не будзе, таму што... я перадумала”.

05.09.2012 Яраслаў Берніковіч: "На рынгу" я застаўся адзін. Дэбаты не адбыліся"

Актывіст кампаніі "Гавары праўду", які балатуецца па Наваполацкай выбарчай акрузе №25, прыехаў у Віцебск на запіс радыёдэбатаў. Аднак яны не адбыліся: не прыехаў галоўны "супернік", спартовец Вадзім Дзевятоўскі.

05.09.2012 У Мінску пакуль толькі пяць кандыдатаў стварылі свае выбарчыя фонды

Кожны кандыдат пасля рэгістрацыі мае права ўтварыць свой асабісты фінансавы фонд у памеры да 1 000 базавых велічынь (100 млн. рублёў). У газеце “Мінскі кур’ер” надрукаваныя рашэнні акруговых выбарчых камісій пра стварэнне выбарчых фондаў толькі пяці кандыдатаў. А ўсяго па Мінску зарэгістравана 87 кандыдатаў.

05.09.2012 Шклоў: праўладны кандыдат выкарыстоўвае службовае становішча падчас агітацыйнай кампаніі

5 верасня кандыдаты ў дэпутаты Палаты прадстаўнікоў па Шклоўскай выбарчай акрузе № 90 - намеснік старшыні партыі БНФ Рыгор Кастусёў і сябра партыі левых “Справядлівы свет” Зінаіда Мілешчанка - падалі ў акруговую камісію сумесную скаргу на дзеянні свайго апанента, намесніка старшыні Камітэту дзяржкантролю Беларусі Аляксандра Агеева.

05.09.2012 Для Вярхоўнага суда “маральна-этычныя” падставы вышэй за закон

Суд заняў пазіцыю Цэнтрвыбаркама, палічыўшы, што па “маральна-этычных” прычынах спадар Солап не можа быць кандыдатам у дэпутаты. Пры гэтым юрыдычныя аспекты справы – дэкларацыя аб даходах і подпісы ў падтрымку вылучэнца не разглядаліся.