Праваабарончы цэнтр «ВЯСНА»

Навіны за Кастрычнік 2011

06.10.2011 Магілёўскі праваабаронца скептычна разглядае падрыхтоўку ўладаў да адбудовы Іосіфаўскага сабора

Уладзімір Краўчанка лічыць, што ўжо на этапе падрыхтоўкі вымалёўваюцца карупцыйныя схемы па адмыванні грашовых сродкаў. "Лічу, што чыноўнікі наўмысна паўключалі артыкулы выдаткаў на пошукі чарцяжоў сабора і падобных будынкаў. Гэта выдаткі звязаныя з камандзіроўкамі і г.д., без якіх можна абысціся. Дастаткова з’ездзіць у Менск”.

06.10.2011 Арганізатараў Народнага сходу выклікалі ў Генпракуратуру

Сустаршыняў аргкамітэту па скліканні Народнага сходу Віктара Івашкевіча і Генадзя Фядыніча выклікалі ў Генеральную пракуратуру Рэспублікі Беларусь на 11 гадзінаў 6 кастрычніка. Прычына выкліку пакуль невядомая.

06.10.2011 У Гомелі пасьля маўклівай акцыі затрымалі траіх

У Гомелі пасьля акцыі маўклівага пратэсту, якая ладзілася ля фантану побач з цыркам, міліцэйскі спэцназ і людзі ў цывільным затрымалі траіх — Васіля Такарэнку, Ільлю Мельнікава і Ксеню Яраслаўцаву. Усяго ў акцыі бралі ўдзел паўтара дзясятка чалавек.

05.10.2011 Баранавічы: большасць жыхароў горада не ведаюць пра Народны сход

5 кастрычніка Баранавіцкая недзяржаўная газета “Intex-press” правяла апытанне жыхароў горада пра ініцыятыву правядзення 8 кастрычніка Народнага сходу. Вынікі паказалі, што большасць апытаных жыхароў Баранавічаў нічога не чулі пра сход.

05.10.2011 У Брэсце затрыманы Вадзім Рабцэвіч

Актывіст гарадской арганізацыі партыі "Справядлівы свет" расклейваў улёткі з інфармацыяй пра дату і месца правядзення ў горадзе Народнага сходу. Ён будзе знаходзіцца ў ізалятары часовага ўтрымання да суда, які адбудзецца 6 кастрычніка.

05.10.2011 Марафон салідарнасці з Алесем Бяляцкім

У Маларыце 8 кастрычніка ўдзельнікі 18-га Міжнароднага марафону праваабаронцы Уладзімір Малей і Васіль Матусевіч пабягуць у майках з надпісам: “Свабоду Алесю Бяляцкаму”. Па словах Уладзіміра Малея, яны хочуць звярнуць увагу мясцовага насельніцтва на чарговае злачынства ўлады ў адносінах да лепшых людзей Беларусі.

05.10.2011 Баранавічы: вызвалены “дзекабрыст” – пад пільным вокам міліцыі

5 кастрычніка 2011 года Дзмітрыю Новіку патэлефанаваў капітан міліцыі Віталь Пляшко і папрасіў былога палітзняволенага прыйсці ў гарадскі аддзел міліцыі, каб стаць на ўлік.

05.10.2011 Магілёў: на аднаго дэмактывіста – два амапаўцы

У Магілёве колькасць амапаўцаў плануюць павялічыць на 150 чалавек.У абласным цэнтры базуецца батальён АМАПу, у якім на 2010 год было каля 200 чалавек. Пасля папаўнення навабранцамі падраздзяленне павялічыцца амаль удвая.

05.10.2011 Таццяна Севярынец другі месяц чакае адказу ад старшыні Віцебскага абласнога суду

Адаслаўшы ліст 26 жніўня і марна прачакаўшы належныя па законе 30 дзён, актывістка прыйшла па адказ сама. Але ў судовай канцылярыі афіцыйную паперу атрымаць не ўдалося.

05.10.2011 Бесчалавечнае абыходжанне з палітычнымі зняволенымі ў Беларусі і пагрозы іх жыццю павінны быць неадкладна спыненыя

Міжнародная Федэрацыя за правы чалавека (FIDH) і яе сяброўская арганізацыя ў Беларусі, Праваабарончы цэнтр "Вясна", рашуча асуджаюць бесчалавечнае абыходжанне з палітычнымі зняволенымі ў турмах Беларусі, у тым ліку адсутнасць здавальняючага медыцынскага абслугоўвання, псіхалагічны ціск у спалучэнні з пастаяннымі пагрозамі смерці і неабгрунтаваным этапаваннем зняволеных.

05.10.2011 Кірмашом па Народным сходзе

Пра тое, што мясцовыя дэмакратычныя актывісты збіраюцца ладзіць Народны сход, у раёне гандлёвага цэнтра “Вэстар” у Бабруйску ведаюць усе, у тым ліку ўлады. Сябра аргкамітэта Віктар Бузінаеў нават даслаў супрацоўнікам міліцыі і прадстаўнікам “вертыкалі” на яго лісты з запрашэннямі.

05.10.2011 Гомельскі грамадскі актывіст Ігар Случак абскарджвае пастанову суда

Гомельскі грамадскі актывіст Ігар Случак абскарджвае пастанову суда аб прыцягненні яго да адміністратыўнай адказнасці за брудную лаянку ў грамадскім месцы і пакаранне ў выглядзе арышту тэрмінам на трое сутак. Адпаведную скаргу ён накіраваў 5 кастрычніка старшыні Гомельскага абласнога суда Людміле Міхальковай.

05.10.2011 Праваабаронцы прызналі Аліневіча, Дзядка і Францкевіча палітычнымі зняволенымі

Праваабарончы цэнтр “Вясна” і Беларускі Хельсінскі Камітэт прызналі Ігара Аліневіча, Мікалая Дзядка, Аляксандра Францкевіча палітычнымі зняволенымі дзеючага ў Беларусі рэжыму. Да такой высновы праваабаронцы прыйшлі на падставе адмыслова праведзенага аналізу так званай “Справы анархістаў”.

05.10.2011 Пракуратура лічыць законным збіццё вязняў у івацэвіцкай калоніі

Пракуратура Брэсцкай вобласці не знайшла падстаў для ўзбуджэння крымінальнай справы ў дачыненні да службовых асоб, вінаватых у збіцці зняволеных івацэвіцкай калоніі № 5. Праверка ўстанавіла, што “прымяненне фізічнай сілы і спецсродкаў супрацоўнікамі калоніі прызнана законным і абгрунтаваным”.

05.10.2011 Алег Мяцеліца: “Я хутка вярнуся на радзіму”

Грамадскі актывіст з Бялыніч Алег Мяцеліца, які пасля падзеяў на Плошчы ў 2010 годзе з’ехаў у Вільню, у хуткім часе збіраецца вярнуцца на радзіму. Зараз Алег з’яўляецца кіраўніком грамадзянска-палітычнага прадстаўніцтва Беларусі ў Літве.