Праваабарончы цэнтр «ВЯСНА»

Навіны за Верасень 2011

07.09.2011 Праваабарончая праграма “Людзьмі звацца!” на Радыё Рацыя

У серыі інтэрв’ю з сябрамі ПЦ “Вясна”, які сёлета адзначыў 15-ты год сваёй дзейнасці, госці рубрыкі “Асоба. Дзяржава. Грамадства” – кіраўнік Наваполацкага аддзялення арганізацыі Зміцер Салаўёў і праваабаронца з Жодзіна Аляксей Лапіцкі.

07.09.2011 Томас Хамарберг: улады спрабуюць спыніць аказанне дапамогі з боку “Вясны”

Камісар па правах чалавека Рады Еўропы Томас Хамарберг размясціў у еўрапейскай палітычнай газеце New Europe свой артыкул, прысвечаны арышту Алеся Бяляцкага. Дыпламат адзначае, што беларускія ўлады спрабуюць спыніць аказанне “Вясной” дапамогі ахвярам парушэнняў правоў чалавека.

07.09.2011 Заява ISC/CD аб затрыманні Алеся Бяляцкага

Міжнародны няўрадавы Каардынацыйны камітэт Супольнасці дэмакратый (ISC/CD) асудзіў арышт вядомага беларускага праваабаронцы Алеся Бяляцкага. ISC/CD патрабуе неадкладна вызваліць старшыню Праваабарончага цэнтру "Вясна" і ўсіх беларускіх палітвязняў.

07.09.2011 Іван Шыла атрымаў 20 сутак

Суд горада Горкі пакараў салігорскага актывіста Маладога Фронту дваццацьцю суткамі арышту за пікет каля калоніі, дзе адбывае пакараньне лідэр арганізацыі Зьміцер Дашкевіч.

07.09.2011 Паручальнікам за Алеся Бяляцкага прыходзяць стандартныя адпіскі

Тацьцяна Севярынец, маці палітвязьня Паўла Севярынца, атрымала адмову на сваё хадайніцтва аб зьмене меры стрыманьня старшыню Праваабарончага цэнтру “Вясна” Алесю Бяляцкаму. Такія ж адмовы атрымліваюць дзесяткі іншых грамадзянаў, якія падпісалі паручальніцтва за арыштаванага праваабаронцу.

07.09.2011 Міліцыя выклікае праваабаронцу «дарабіць пратакол»

6 верасьня на працу да гомельскага праваабаронцы Анатоля Паплаўнага завітаў маёр Цэнтральнага райаддзелу міліцыі Ўладзіслаў Шукель. Лякальшчыка Паплаўнага выклікалі на прахадную, дзе маёр уручыў яму позву — зьявіцца 7 верасьня ў аддзел дзеля «дапрацоўкі пратаколу».

07.09.2011 Ваўкавыск: у суд за тое, што заклікаў на народны сход

Ваўкавыскі актывіст Віталь Гуляк атрымаў сёньня позву ў раённы суд. У пятніцу адбудзецца разгляд яго адміністрацыйнай справы, як напісана ў пратаколе: за «пікетаваньне з мэтай закліку на народны сход 8 кастрычніка 2011 году».

06.09.2011 Па справе Алеся Бяляцкага дапытаная праваабаронца Тацьцяна Рэвяка

6 верасьня ва ўпраўленні Дэпартаменту фінансавых расследванняў Камітэту дзяржкантролю ў якасьці сьведкі па справе Алеся Бяляцкага была дапытаная праваабаронца Тацьцяна Рэвяка. Допыт доўжыўся каля 40 хвілінаў.

06.09.2011 Стэфановіч прыедзе з-за мяжы на судовы працэс

Падатковая інспэкцыя Партызанскага раёну Менску пастанавіла спагнаць зь сябра праваабарончага цэнтру "Вясна" Валянціна Стэфановіча 31 мільён 500 тысяч рублёў нібыта ўтоенага падатку. А таксама 6 мільёнаў рублёў пені. Падаткоўцы накіроўваюць у суд Партызанскага раёну пазоў аб спагнаньні гэтых грошай у сувязі зь іх няплатай у добраахвотным парадку. Дата пасяджэньня суду пакуль не прызначаная.

06.09.2011 Адхілены ад працэсу прадстаўнік дапамог маці ахвяры выбуху на “Пінскдрэве” выйграць справу

Праваабаронца Уладзімір Малей ня быў дапушчаны на судовы працэс у якасьці прадстаўніка маці загінулага падчас аварыі на “Пінскдрэве” Яўгена Рапуты. Тым не меньш, справа была вырашаная на карысьць Людмілы Рапуты. Прадпрыемства выплаціць ёй кампенсацыю ў памеры 30 мільёнаў рублёў.

06.09.2011 Суд над Галінай Кавалевіч перанесьлі

Судзьдзя бярозаўскага суду Дзьмітры Карцінскі перанёс судовае паседжаньне па адміністрацыйнай справе супраць старшыні мясцовай суполкі КХП-БНФ.

06.09.2011 Мэр Парыжу занепакоены арыштам Алеся Бяляцкага

Мэр Парыжу Бертран Дэланоэ адрэагаваў на арышт Алеся Бяляцкага, віцэ-прэзідэнта Міжнароднай Федэрацыі за правы Чалавека (FIDH) і прэзідэнта беларускага праваабарончага цэнтра "Вясна" адмысловай заявай.

06.09.2011 Эўразьвяз не задаволіцца памілаваньнем палітвязьняў

Дзяржавы Эўразьвязу лічаць, што беларускія ўлады павінны не памілаваць асуджаных па справе "19 сьнежня", а рэабілітаваць, заявіла ў інтэрвію агенцтву "Інтэрфакс-Захад" амбасадар Вялікабрытаніі ў Беларусі Розмары Томас.

06.09.2011 Эўрадэпутат Манфрэд Вэбэр падтрымае палітвязьня Зьмітра Новіка

Дэпутат Эўрапарлямэнту Манфрэд Вэбэр заявіў, што бярэ шэфства над палітвязьнем Зьміцерам Новікам.

06.09.2011 Рада па правах чалавека ААН правядзе дэбаты па Беларусі

Рада па правах чалавека ААН плянуе правесьці дэбаты па Беларусі на 18-й сэсіі ААН у Жэнэве (12-30 верасьня). Праваабарончая арганізацыя Amnesty International падрыхтавала да дэбатаў справаздачу з аглядам сытуацыі з правамі чалавека ў Беларусі.