Навіны на тэму: умовы ўтрыманьня
27.03.2008 На Акрэсьціна не бяруць ваду і вопратку
Па зьвестках ад сваякоў і сяброў зьняволеных, кіраўніцтва спэцпрыёмніка забараніла перадачу цёплае вопратцы і вады затрыманым, якія зараз знаходзяцца на Акрэсьціна. Дазволена перадаваць толькі ежу і сок. Як кажуць былыя «наведвальнікі» Акрэсьціна, бязь цёплае вопраткі там вельмі цяжка, у некаторых камэрах дужа халодна й дзьме з вокнаў.
20.03.2008 Аляксандру Казуліну паўторна адмоўлена ў змякчэнні пакарання
Пра гэта паведаміў “Інтэрфакс” са спасылкай на суразмоўцаў у калоніі “Віцьба-3”, дзе сядзіць палітык.
12.03.2008 Вызваленага ад крымінальнай адказнасьці Аляксандра Крутога гвалтоўна накіравалі ў псіхіятрычную лякарню
3 сакавіка Аляксандр Круты выправіўся ў нясвіжскую паліклініку, каб стаць на ўлік. Аднак тут яго перастрэлі супрацоўнікі міліцыі і ў той жа дзень прымусова адвезлі ў Рэспубліканскую псіхіятрычную клініку ў Навінках.
19.02.2008 Аляксандр Круты сёньня можа пакінуць сьцены Жодзінскага СІЗА
Судовая калегія па крымінальных справах Мінскага абласнога суда адмяніла пастанову суда Нясвіжскага раёна па абвінавачваньню Аляксандра Крутога ў публічнай абразе прэзідэнта Беларусі і адмяніла вытворчасьць па ягонай справе.
18.02.2008 "Голад, холад, пацукі" - Франак Вячорка пра ўмовы свайго ўтрымання ў следчым ізалятары на Акрэсціна
Старшыня культурніцкай камісіі Партыі БНФ адлічаны з журфаку БДУ за “акадэмічную непаспяховасць”. Ён не паспеў здаць экзамены па прычыне таго, што адбываў 15 сутак арышту за “нецэнзурную лаянку ў грамадскім месцы”.
15.02.2008 Умовы ўтрыманьня Аляксандра Крутога ў Жодзінскім СІЗА зьяўляюцца катаваньнямі
Тры тыдні ў Жодзінскім СІЗА пазапраўна знаходзіцца вызвалены судом ад крымінальнай адказнасьыці Аляксандр Круты. Як стала вядома ПЦ “Вясна”, умовы, створаныя для Аляксандра Крутога ў Жодзіна, зьяўляюцца катаваньнямі над асобай. Увесь гэты час ён утрымліваецца ў камеры-адзіночцы для асобаў, асуджаных пажыцьцёва. Вязьню забараняюць чытаць газеты, карыстацца літаратурай, нават падручнік ангельскай мовы, які прывезьлі сваякі, не дазволілі перадаць у камеру. Скарочаная на поўгадзіны працягласьць штодзённых прагулак. Усе тры тыдні пад час штодзённых аглядаў, да яго не заходзіць ні начальнік СІЗА, ні іншыя адказныя асобы.
31.01.2008 Вызвалены ад пакараньня Аляксандр Круты безпадстаўна знаходзіцца ў Жлобінскім СІЗА
24 студзеня суд Нясвіжскага раёна прызнаў Аляксандра Крутога віноўным у зьдзяйсьненьні крымінальнага злачынства па арт. 368 КК РБ - публічная абраза прэзідэнта краіны. Аднак у сувязі з тым, што дзеяньні асуджанага не нясуць вялікай пагрозы для грамадзтва, Аляксандр Круты вызвалены ад пакараньня, а крымінальная справа спыненая. Паколькі падчас сьледства ў дачыненьні да абвінавачанага праводзілася судова-медыцынская экспертыза, якая ўстанавіла, што Аляксандр Круты хворы на паранаідальную шызафрэнію, суд пастанавіў прымяніць прымусовыя меры бяспекі і лячэньня ў псіхіятрычнай бальніцы са звычайным назіраньнем.
28.01.2008 У нядзелю з турмы на Акрэсьціна на волю выйшаў сябра каардынацыйнай рады прадпрымальнікаў Алесь Макаеў
У нядзелю з турмы на Акрэсьціна на волю выйшаў сябра каардынацыйнай рады прадпрымальнікаў Алесь Макаеў. Яго выпусьцілі датэрмінова, а 8‑й гадзіне раніцы, хаця па пратаколу мусілі выпусьціць у 11.30. Спадар Макаеў усе 15 сутак арышту адмаўляўся ад ежы.
24.01.2008 Суд прызнаў Аляксандра Крутога віноўным і накіраваў яго на лячэньне
У Нясьвіжскім судзе абвешчаны прысуд па крымінальнай справе Аляксандра Крутога. Ён прызнаны віноўным у зьдзяйсьненьні крымінальнага злачынства па арт. 368 КК РБ - публічная абраза прэзідэнта краіны. У сувязі з тым, што дзеяньні асуджанага не нясуць вялікай пагрозы для грамадзтва, Аляксандр Круты вызвалены ад пакараньня, а крымінальная справа спыненая. Паколькі падчас сьледства ў дачыненьні да абвінавачанага праводзілася судова-медыцынская экспертыза, якая ўстанавіла, што Аляксандр Круты хворы на паранаідальную шызафрэнію, матэрыялы накіраваныя ў медустанову з мэтай правядзеньня стацыянарнага лячэньня ва ўмовах звычайнага рэжыму.
23.01.2008 Суд над Аляксандрам Крутым: “Псіхіятрыя ў якасьці зброі супраць палітычных апанентаў”
Сёньня ў Нясьвіжы ў 16-00 будзе абвешчаны прысуд па крымінальнай справе Аляксандра Крутога. Ён абвінавачваецца ў публічнай абразе прэзідэнта яшчэ ў траўні 2003 года (артыкул 368 Крымінальнага Кодэксу РБ). Адвакатам на судзе выступае Марыяна Сямешка. Гэты працэс атрымаў шырокі грамадскі рэзананс, паколькі пад час сьледства ў дачыненьні да Крутога праводзілася судова-медыцынская экспертыза, якая ўстанавіла, што А. Круты хворы на паранаідальную шызафрэнію. Вось як ацэньвае ганебную практыку выкарыстаньня карнай псіхіятрыі віцэ-прэзідэнт Міжнароднай федэрацыі правоў чалавека Алесь Бяляцкі: “Мы, праваабаронцы, глыбока занепакоены тым фактам, што псіхіятрыя ў Беларусі ўсё часьцей і часьцей выкарыстоўваецца ў якасьці зброі супраць палітычных апанентаў улады. Гэтая форма ўціску на дэсідэнтаў была шырока распаўсюджаная ў Савецкім Саюзе. За 2007 год мы адзначылі некалькі выпадкаў ужываньня псіхіятрыі як сродка пакараньня ці ўціску на грамадзкіх і палітычных актывістаў.
22.01.2008 У якіх умовах трымаюць Аляксандра Зьдзьвіжкова?
Аляксандар Зьдзьвіжкоў ужо болей за два месяцы сядзіць у спэцтурме КДБ — “амэрыканцы”, прызначанай для абвінавачаных у асабліва цяжкіх злачынствах.
16.01.2008 Вера Страмкоўская: "Умовы ўтрымання вельмі дрэнныя"
Учора адвакат Вера Страмкоўская наведала ў прыёмніку-размеркавальніку асуджаных на "суткі" пасля акцыі прадпрымальнікаў.
16.01.2008 Хворыя на сухоты даведзеныя да адчаю
Выдавец незалежнага бюлетэня "Бойкі Клецк" Сяргей Панамароў, супраць якога ўжо некалькі разоў аднаўлялі і спынялі ўзбуджаную за абразу дзяржчыноўніцы ў друкаваным выданьні крымінальную справу, зьвяртаецца да журналістаў з прозьбай наведаць рэспубліканскі шпіталь для хворых на сухоты ў Новаельні Дзятлаўскага раёну, каб на ўласныя вочы пабачыць і зафіксаваць, у якіх умовах праходзіць лячэньне. Галадоўка, якую спантанна аб'явілі хворыя па прычыне такіх невыносных умоў знаходжаньня ў клініцы, як кепскае харчаваньне, адсутнасьць гарачай вады і нізкая тэмпература ў палатах, не прынесла ім палегку. 15-га студзеня ў шпіталь прыехалі чыноўнікі, і, як адзначае сп. Панамароў, «прайшліся» па ляжачым хворым, не зьвярнуўшы ўвагу на 105 чалавек, якія падпісаліся пад зваротам з патрабаваньнямі на імя галоўурача Мечыслава Доўганя".
14.01.2008 На што арыштаваныя маюць права
З 8 жніўня 2007 г дзейнічае новая пастанова МУС РБ № 194 "Аб зацьверджаньні правілаў унутраннага распарадку спецыяльных установаў органаў унутраных справаў, якія выконваюць адміністратыўнае спагнаньне ў выглядзе адміністратыўнага арышту". У дадзеным дакуманце расьпісаны парадак і ўмовы ўтрыманьня адміністратыўна затрыманых і адміністратыўна арыштаваных у спецустановах, якім зьяўляецца спецпрыёмнік ГУВД на Акрэсьціна. Паколькі ў палажэньні таксама ўказана, на што маюць права арыштаваныя, мы прывялі гэтую пастанову цалкам на рускай старонцы нашага сайту з тым, каб можна было абскарджваць парушэньні ўмоваў утрыманьня і законных правоў адміністратыўна арыштаваных і затрыманых, гарантаваныя беларускім заканадаўствам.
13.01.2008 Умовы ўтрыманьня на Акрэсьціна трэба абскарджваць
Дэмакратычны актывіст Мікола Сяргеенка, асуджаны 17 сьнежня судом Ленінскага раёну Менску да адбыцьця дзесяцісуткавага арышту па абвінавачаньню ў брыдкаслоўі на адрас міліцыянтаў падчас захопу офісу Беларускага кангрэса дэмакратычных прафсаюзаў, зьвярнуўся са скаргай на ўмовы ўтрыманьня на Акрэсьціна. Зараз пасьля акцыі пратэсту прадпрымальнікаў больш за 20 дэмакратычна-палітычных актывістаў знаходзяцца ў спецпрыёмніку-размеркавальніку ГУУС на Акрэсьціна, таму мы зьвяртаем ўвагу на тое, што трэба зьвяртацца са скаргамі на нечалавечыя ўмовы ўтрыманьня. У сувязі з гэтым прыводзім як прыклад напісаньня скаргу Міколы Сяргеенка.
