viasna on patreon

Назіральніца выявіла на ўчастку дзве неапячатанныя дзверы — яе пазбавілі акрэдытацыі

2020 2020-08-08T18:14:54+0300 2020-08-08T18:14:56+0300 be https://spring96.org/files/images/sources/vybary_899.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

У Мінску на ўчастку №25 Цэнтральнага раёна назіральнікі выявілі, акрамя асноўнай, яшчэ дзве неапячатаныя дзверы, якія вядуць на ўчастак. Але замест таго, каб разабрацца ў гэтай сітуацыі і вырашыць праблему, участковая камісія пазбавіла назіральніцу кампаніі "Праваабаронцы за свабодныя выбары" Кацярыну Клёц акрэдытацыі. 

Як распавядае незалежная назіральніца Кацярына Клёц, увечары 7 жніўня, на чацвёрты дзень датэрміновага галасавання назіральнікі даведаліся, што на ўчастку для галасавання, акрамя асноўнага ўваходу, ёсць яшчэ дзве дзверы: адна злучаная з пакоем міліцыі, іншая — з каморкай. Гэта пацвердзіў і пажарны план памяшкання. Саміх жа назіральнікаў дапусцілі на ўчастак толькі ў момант пламбавання скрыні.

"Перад перапынкам мы зайшлі на ўчастак і пераканаліся, што тыя дзве дзверы ніяк не апячатваюцца. На той момант у нас было пяць назіральнікаў. Мы пачалі запытвацца ў сябраў камісіі, чаму ў іх вядуць іншыя дзверы на ўчастак і яны ніяк не апячатаныя. Старшыня камісіі Наталля Ахрэмчык і сакратар пачалі гаварыць штосьці невыразнае, што ў іх сігналізацыя і ніхто патрапіць на ўчастак не можа. Пры гэтым асноўны ўваход ўчастка таксама не апячатваецца. Адзін з назіральнікаў звярнуў увагу, што пару дзён таму спрацоўвала сігналізацыя ў перапынку і супрацоўнікі не змаглі растлумачыць чаму. Сакратарка спачатку казала, што вецер падзьмуў, потым — што нехта тузануў ручку", — распавядае незалежная назіральніца.

Участак знаходзіцца ў кабінеце №103
Участак знаходзіцца ў кабінеце №103

Назіральнікі спыталі, ці можна адкрыць дзверы, каб праверыць, ці на самой справе гэта так. Па словах назіральніцы Кацярыны, падняўся крык і ў гэты момант дзверы адчыніліся. Сябры камісіі сталі крычаць, што сабе дазваляюць назіральнікі. Назіральніца Ірына Тамашэўская, якая працуе ў гэтым Палацы моладзі дырэктаркай па інавацыйнай дзейнасці сказала незалежнай назіральніцы, што напіша заяву, каб пазбавіць яе акрэдытацыі.

"Абстаноўка была вельмі нервовая, усе назіральнікі казалі пра гэтыя дзверы. Іх так і не апячаталі. Я некалькі разоў выбачылася, што не так зразумела дазвол пра адкрыццё дзвярэй".

Раніцай 8 жніўня незалежнай назіральніцы паведамілі, што яе пазбавілі акрэдытацыі. УВК №25 Цэнтральнага раёна аргументаваў сваё рашэнне тым, што назіральніца нібыта "пранікла ў дапаможнае памяшканне ўчастка". Таксама ў рашэнні ўказваецца, што яна ўмешваецца ў працу камісіі і перашкаджае ходу выбараў.

"Я спытала ў старшыні камісіі, ці праводзілася паседжанне, яна сцвярджае, што нібыта сёння ў 9:30 раніцы [заўвага — рашэнне ж датуецца 7 жніўня]. Але нас, назіральнікаў, у парушэнне артыкула 13 Выбарчага кодэкса аб гэтым не апавясцілі. На маё пытанне, ці магу азнаёміцца з пратаколам паседжання, мне проста адказалі: "Не". Спытала колькі членаў камісіі прысутнічалі на паседжанні, мне сказалі, што есм [Заўвага — ва ўчастковую камісію ўваходзяць 13 чалавек]. Аднак і на мае заўвагі аб тым, на паседжанні павінна прысутнічаць 2/3 камісіі, ніхто не адрэагаваў".

Пасля ўсіх указанняў на парушэнні, Кацярыне Клёц сказалі пакінуць Палац моладзі, інакш назіральніцу выведзе міліцыя. Каля ўчастка назіральнікам таксама забараняецца знаходзіцца.

"Праваабаронцы за свабодныя выбары"

Апошнія навіны

Партнёрства

Сяброўства