Новыя затрыманні, суды і выпадкі ціску. Хроніка пераследу за чацвёртае жніўня Дапоўнена
Праваабарончы цэнтр "Вясна" працягвае збіраць звесткі са ўсёй краіны пра факты палітычна матываванага пераследу грамадзян. Паведамляем пра затрыманні, пагрозы затрыманнямі, складанне пратаколаў і выклікі ў міліцыю, якія адбыліся ці пра якія стала вядома чацвёртага жніўня.
|
З пачатку бягучай выбарчай кампаніі 217 чалавек атрымалі агулам 3092 сутак арышту па адміністрацыйных артыкулах, выкарыстаных у мэтах палітычнага пераследу. 368 чалавек атрымалі штрафы агульным памерам больш за 286000 рублёў (больш за 116.000$). Праваабаронцам вядома як мінімум пра 1340 выпадкаў адвольных затрыманняў, якія адбыліся ў перыяд з 6 траўня па 4 жніўня. |
Ізаляцыя актывістаў перад выбарамі працягваецца. Хроніка пераследу 2 і 3 жніўня
Мінск
Дзяўчыне палітзняволенага Дзмітрыя Фурманава Вользе Каракінай, якая другі тыдзень трымае галадоўку каля СІЗА-1 на вул. Валадарскага ў Мінску, а таксама тым, хто прыходзіць яе падтрымаць, міліцыя пагражае складаннем пратакола за несанкцыянаванае пікетаванне (па арт. 23.34 КаАП). Вольга паведаміла "Вясне", што сышла ад СІЗА і спыніла галадоўку.
Паведамляецца пра зарыманне 3 жніўня Вікторыі Канюшэнка. Абставіны затрымання высвятляюцца.
Таксама быў затрыманы ўдзельнік велапрабегаў салідарнасці Алякей Дідзенка. Яго даставілі ў РУУС Маскоўскага раёна, склалі пратакол за "дробнае хуліганства" (арт. 17.1 КаАП). Па папярэдняй інфармацыі - за распаўсюд улётак.
Затрыманы актывіст "Еўрапейскай Беларусі" Максім Вінярскі абвесціў сухую галадоўку і чакае новы суд па арт. 23.4 КаАП (непадпарадкаванне супрацоўнікам міліцыі). Пасяджэнне адбудзецца ў 16.00 у судзе Маскоўскага раёна. Дапоўнена: Вінярскаму прысудзілі 13 сутак арышту.
Затрыманага ўвечары нядзелі за расклейку плакатаў Андрэя Клінцова асудзілі на 15 сутак па арт. 17.1 КаАП (дробнае хуліганства). Рашэнне вынес суд Першамайскага раёна.
Позна ўвечары 4 жніўня затрымалі Аляксея Санчука і Сяргея (прозвішча ўдакладняецца) за расклейку плакатаў. Павезлі ў РУУС Савецкаша раёна.
У Мінску на ўчастку для галасавання затрымалі назіральніка
Кобрын
4 жніўня плануецца працяг суда над затрыманымі ў мінулую пятніцу Уладзімірам Нікульшыным і Алегам Барысюком (каардынатар ініцыятыўнай групы Валерыя Цапкалы). Актывісты выходные ўтрымліваліся ў Кобрынскім ІЧУ, у панядзелак 3 жніўня іх пачалі судзіць за ўдзел у несанкцыянаваным масавым мерапрыемстве (арт. 23.34 КаАП).
Дапоўнена: Абодва актывісты атрымалі па 15 сутак арышту.
Столін
У Праваабарончы цэнтр "Вясна" звярнулася Аксана Дабрыянец - валанцёрка ініцыятыўнай групы Святланы Ціханоўскай са Століна, якая дапамагала падчас збору подпісаў. Аксана паведаміла, што да яе маці, якая працуе ў школе, падыходзіў дырэктар і распавядаў, што ў школу прыходзіла міліцыя і распытвала пра яе дачку. Міліцыянтаў цікавіла, дзе яна жыве і працуе, чым займаецца.
- Аксана Дабрыянец, валанцёрка ІГ Ціханоўскай са Століна
Таксама Аксана паведаміла пра іншую дзяўчыну са Століна - Паліну Новік, якую пад падставай апытання аб прапаўшым тэлефоне даставілі ў РАУС і распытвалі пра расклеўку агітацыйных улётак.
Баранавічы
4 жніўня мусіў адбыцца суд над затрыманым напярэдадні адміністратарам тэлеграм-канала "Баранавічы для жыцця" Ігарам Шумілавым. У парушэнні якога дакладна артыкула адмінітрацыйнага кодэкса яго вінавацяць, невядома.
Дапоўнена: Суд над Ігарам Шумілавым прайшоў таемна. Увесь дзень праваабаронца "Вясны" з Баранавічаў Аляксандр Вайцешык чакаў суда над ім. У другой палове дня разам са сваякамі ён прыехаў да ізалятара, каб перадаць перадачу, але спачатку яе не прынялі, спаслаўшыся на тое, што Шумілава ўвезлі на суд. Калі Вайцешык вярнуўся ў будынак суда, то там паведамілі, што Ігара Шумілава ў іх няма. Урэшце ў сваякоў прынялі для яго перадачу, але не паведамілі, калі, па якім артыкуле і на колькі сутак арышту ён быў асуджаны. Толькі адзін з міліцыянтаў параіў сваякам адлічваць 10 сутак з моману затрымання. Верагодна на столькі сутак ён і быў асуджаны.
Чачэрск
3 жніўня быў затрыманы актывіст, жыхар Чачэрску Юрый Кавалёў. Пры затрыманні быў задзейнічаны АМАП. Падрабязнасці затрымання высвятляюцца. Ноч ён правёў у Гомельскім ІЧУ, яго павезлі на суд. У выніку ён атрымаў 15 сутак.
Таксама праваабаронцам паведамілі, што на сувязь суткі не выходзіць сын Юрыя Арцём Кавалёў. Верагодна ён таксама затрыманы.
Нароўля
У Нароўлі судзілі затрыманага напярэдадні актывіста і валанцёра "Страны для жизни" Мікалая Віткоўскага. На яго склалі пратакол за непадпарадкаванне міліцыі (арт. 23.4 КаАП) - нібыта за тое, што ён адмаўлсяўся праехаць з супрацоўнікамі міліцыі. У выніку прысудзілі 12 сутак арышту.
Шклоў
БАЖ паведамляе пра затрыманне ў Шклове журналістаў тэлеканала “Белсат” Станіслава Івашкевіча, Івана Мураўёва і Вольгі Ратміравай. Іх затрымалі прыкладна а 15:30, але паведаміць пра затрыманне яны змаглі толькі ўвечары. Праз некалькі гадзін затрыманых вызвалілі, але забралі мабільныя тэлефоны.
Гродна
4 жніўня гарадзенскага грамадска-палітычнага актывіста Ежы Грыгенчу забралі людзі ў цывільным адбываць адміністрацыйны арышт у ІЧУ. 13 ліпеня суддзя Ларыса Барэль прысудзіла Грыгенчу 10 сутак адміністрацыйнага арышту за ўдзел у масавым несанкцыянаваным мерапрыемстве. Аднак пад арышт яго не ўзялі пасля суда, а адмыслова чакалі часу датэрміновага галасавання.
У Парэччы (Гарадзенскі раён) затрымалі двух 19-гадовых хлопцаў Паўла Чыліка і Яна Галубовіча за расклейку ўлётак. На іх склалі пратаколы па арт. 9.11 КаАП.
Віцебск
Віцебскі актывіст «Народнай Грамады» і валанцёр каманды Ціханоўскай Аляксандар Якушкоў быў затрыманы 4 жніўня і змешчаны ў ізалятар часовага ўтрымання. За кратамі ён мусіць правесці 8 сутак арышту, якія яму прысудзілі за ўдзел у перадвыбарчых пікетаваннях і якія не далі адбыць поўнасцю да выбараў. Пра гэта паведаміў «Віцебскай Вясне» паплечнік Якушкова Алег Паўлаў.
Магілёў
У Магілёве незалежнага назіральніка прама на ўчастку затрымала міліцыя
Будзе дапаўняцца.
