Станіслаў Паўлінковіч: Я нічога не парушаў. Так што калі трэба – самі няхай бегаюць

2020 2020-02-18T08:57:49+0300 2020-02-18T08:57:50+0300 be http://spring96.org/files/images/sources/paulinkovich.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Cтаніслаў Паўлінковіч. Фота Радыё Свабода.

Cтаніслаў Паўлінковіч. Фота Радыё Свабода.

Актывіста Станіслава Паўлінковіча пераследуе магілёўская міліцыя. Верагодна, за акцыі супраць інтэграцыі з Расеяй, піша mspring.online.

Супрацоўнікі Ленінскага РАУС Магілёва заявіліся наўпрост на працу да хлопца.

Актывіст Станіслаў Паўлінковіч паведаміў праваабаронцам «Магілёўскай вясны», што да яго ў пятніцу, 14 лютага, на працу заявіліся супрацоўнікі міліцыі і спрабавалі ўручыць позву для яўкі ў РАУС.

– Мяне паклікаў майстар, сказаў, што яму тэлефанаваў начальнік аховы. Сказаў, што мяне хтосьці чакае на прахадной, – распавёў Стас. Ён працуе на Магілёўскім металургічным заводзе.

Паводле яго слоў, супрацоўнікі РАУС не паведамілі яму пра прычыны выкліку – толькі сказалі, што ён усё дазнаецца, калі з’явіцца ў райаддзел ў панядзелак, 17 лютага.

– Мне нічога не патлумачылі. Нібыта, нейкі адміністрацыйны працэс. Хутчэй за ўсё – за ўдзел у снежаньскіх акцыях пратэсту супраць інтэграцыі з Расеяй. Больш проста няма за што – я нікуды не уліпаў, ні з кім не біўся, не пападаўся па п’яні. Так што, хутчэй за ўсё, справа тычыцца масавых мерапрыемстваў. Дзіўна, што яны так доўга нічога не рабілі – з тых мітынгаў прайшло ўжо амаль два месяцы, – распавёў Паўлінковіч.

Ён паведаміў, што позву ўзяць адмовіўся. У панядзелак яму патэлефанавалі з Ленінскага РАУС і ўдакладнілі, ці прыйдзе актывіст, на што Станіслаў паўторна адмовіў.

– Я не збіраюся кудысці хадзіць і бегаць. Я ведаю, што я нічога не парушаў. Так што калі трэба – самі няхай бегаюць, – заявіў актывіст.

Апошнія навіны

Партнёрства

Сяброўства