viasna on patreon

Гарадзенскія праваабаронцы выступілі супраць дыскрымінацыі беларускай мовы

2019 2019-08-19T17:22:09+0300 2019-08-19T17:32:17+0300 be https://spring96.org/files/images/sources/sazon_khilm_jurgel.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Уладзімір Хільмановіч,  Віктар Сазонаў, Раман Юргель. Фота "Гарадзенскай Вясны"

Уладзімір Хільмановіч, Віктар Сазонаў, Раман Юргель. Фота "Гарадзенскай Вясны"

Гарадзенскія назіральнікі кампаніі “Праваабаронцы за свабодныя выбары” Віктар Сазонаў, Раман Юргель і Уладзімір Хільмановіч накіравалі ў абласны і гарадскі выканаўчыя камітэты звароты з нагоды дыскрымінацыі беларускай мовы.

У іх яны звяртаюць увагу на тое, што адбываецца сістэмная дыскрымінацыя беларускай мовы на галоўных дзяржаўных сайтах вобласці. Нават зараз, у час выбарчай кампаніі, калі заканадаўства абавязвае праз сайты выканкамаў належна інфармаваць насельніцтва пра ход кампаніі, на беларускамоўных версіях сайтаў беларуская мова ігнаруецца. Змест у нібыта беларускамоўнай версіі сайтаў падаецца толькі па-руску, адзначаюць праваабаронцы.

У тэксце звароту ў аблвыканкам гаворыцца наступнае:

"Сайт Гродзенскага абласнога выканаўчага камітэта ёсць галоўным дзяржаўным сайтам Гродзенскай вобласці. Ён з’яўляецца важным элементам камунікацыі і інфармавання грамадзян пра дзяржаўную палітыку і жыццё рэгіёна. На жаль, гэты сайт паўнацэнна функцыянуе і інфармуе грамадзян толькі на рускай мове. А між тым, дзяржаўная беларуская мова ёсць адной з найпершых адметнасцяў нашай краіны. Мова тытульнай нацыі не можа быць дыскрымінаваная, тым больш, што паводле Канстытуцыі Рэспублікі Беларусь яна з’яўляецца дзяржаўнай і гістарычна першай атрымала такі статус. Беларуская мова ў публічнай камунікацыі дэманструе ўсім незалежнасць нашай дзяржавы, прэзентуе адметнасць яе культуры і традыцый”.

Назіральнікі падкрэсліваюць, што ўсё сказанае датычыцца і інфармацыі пра выбары ў краіне. На сайце створаны беларускамоўны банер “Выбары”, аднак напаўненне гэтай рубрыкі поўнасцю на рускай мове. Інфармацыя пра выбарчыя акругі і іншае пададзена толькі па-руску.

“Абапіраючыся на вышэйсказанае, прапануем вам стварыць і мець на афіцыйным сайце паўнацэнную беларускамоўную версію. Гэта будзе адпавядаць поўнасцю заканадаўству Рэспублікі Беларусь. Упэўнены таксама, што гэта будзе спрыяць росту аўтарытэту рэгіянальнай дзяржаўнай улады”, - кажуць праваабаронцы.

Сазонаў, Юргель і Хільмановіч просяць пісьмова паведаміць пра захады і меры, зробленыя ў адпаведнасці з дадзеным зваротам, у вызначаны законам тэрмін.

Аналагічны зварот назіральнікі падалі і ў Гарадзенскі гарвыканкам.

"Праваабаронцы за свабодныя выбары"

Апошнія навіны

Партнёрства

Сяброўства